![التحضير لامتحان اللغة الطبية](https://facharztJETZT.de/wp-content/uploads/التحضير-لامتحان-اللغة-الطبية.png)
• مقدمة
في هذه المقالة يشرح لكم الدكتور محمد أبو عيد له كل الشكر مقارنة بين اشهر ثلاث طرق للتحضير لامتحان اللغة الطبية (امتحان الفاخ الشبراخه).
تمت اضافة مقالات من موقعنا لها علاقة بهذه المقالة لنص مقالة الدكتور أبو عيد. تم أيضاً إضافة عناوين حسب قواعد SEO لمحركات البحث.
إذا كنت لا تعرف بالضبط ما هو هذا الامتحان، ننصحك بقراءة هذه المقالة:
🇩🇪 امتحان اللغة الطبية الألمانية – Die Fachsprachenprüfung (FSP)
إذا كان لديك أية شكوك أو تحتاج إلى مزيد من التوضيح، فلا تتردد في طرح الأسئلة في أي وقت في المجموعة الرئيسية لمجتمع فاخ آرتست يتست (Facharzt JETZT) على الفيسبوك والتيليجرام (سيتم إضافة جميع مجموعات التيليجرام كفولدر). هذه المقالة هي لمساعدتك على فهم الأمور، ولكن مع ذلك، لا ينبغي أن تكون مصدرك الوحيد. دائماً استشر المواقع الرسمية للحصول على المعلومات الأكثر دقة وتحديثاً (يمكنك قراءة إخلاء المسؤولية الكامل هنا).
• ما هي أفضل طريقة للتحضير لامتحان اللغة الطبية FSP؟
كثير من الزملاء والزميلات بسألوا ما هي أفضل طريقة للتحضير لامتحان الـFSP وشو أفضل طريقة للتحضير للامتحان.
- أدرس لحالي في البيت؟
- ولا أداوم Hospitation؟
- ولا آخذ دورة تحضيرية للامتحان؟
![التحضير لامتحان اللغة الطبية](https://facharztJETZT.de/wp-content/uploads/abu-eid.png)
• الجواب: يمكنك القيام بواحد من ثلاثة أشياء
الإجابة هي واحدة من الأشياء الثلاثة المذكورة أعلاه:
– في زملاء أخذوا دورات تحضيرية وعملوا هوسبيتاسيون (Hospitation) وبحمدالله وتوفيقه نجحوا من أول محاولة، وفي منهم للأسف ما توفقوا واضطروا يعيدوا الامتحان كمان مرة.
– في زملاء أخذوا فقط دورة تحضيرية وما عملوا (Hospitation)، وبحمدالله وتوفيقه نجحوا من أول محاولة، وفي منهم للأسف ما توفقوا واضطروا يعيدوا الامتحان كمان مرة.
– وفي زملاء درسوا لحالهم في البيت، ولا أخذوا دورة تحضيرية ولا عملوا (Hospitation)، وبحمدالله وتوفيقه نجحوا من أول محاولة، وفي منهم للأسف اضطروا يعيدوا الامتحان كمان مرة، منهم اللي عمل (Hospitation) ومنهم اللي عمل دورة تحضيرية قبل المحاولة الثانية، وبعدها بحمدالله وتوفيقه نجحوا.
• أعرف طبيعة امتحان اللغة الطبية أولاً
في البداية لازم تفهموا طبيعة امتحان اللغة الطبية (FSP)، يوجد فيديوهات عاليوتيوب بتشرح عن كيفية الامتحان وآلية التقييم، وبعملوا محاكاة بين طبيب ومريض اشي مقارب للامتحان، حلو إنكم تشوفوا هاي الفيديوهات عشان توضح الصورة.
مقالة مفصلة عن امتحان اللغة الطبية من موقعنا:
🇩🇪 امتحان اللغة الطبية الألمانية – Die Fachsprachenprüfung (FSP)
• إيجابيات وسلبيات كل خيار حسب تجربتي وتجارب الزملاء
1. الدورات التحضيرية:
الدورات في ألمانيا عدة أنواع، والأسعار متنوعة، في ب500 يورو وفي ب1000 يورو، وفي ب2000 يورو وفيه ب3500 يورو. مش دائماً الحكي هاد صحيح، ولكن بالنسبة لهاي الدورات في ألمانيا حسب التجربة الغالي سعره فيه، وشو ما دفعت زيادة بتلاقي، وفي خيارات متنوعة بتقدر تختار اللي بناسبك. ولكن كل ما زاد سعر الكورس، قل عدد الطلاب المشاركين، زادت نسبة مشاركة الطالب الواحد خلال الكورس، وزادت الفائدة وبالعكس، كل ما قل سعر الكورس رح تلاقي عكس المعطيات اللي فوق. الكورس اللي ب3500 يورو ممكن تلاقي فيه 6 طلاب، والكورس اللي ب500 يورو ممكن تلاقي فيه 30 طالب.
في دورات ممكن يطلب الطبيب تمويل عشانها من الـ(Agentur für Arbeit)، ولكن بشترطوا إنه الطبيب يكون معه إقامة (Aufenthaltstitel)، وهاد الاشي ممكن يوخذ من 3 ل6 أشهر من وصول الطبيب لألمانيا. وفي دورات ممكن إنه الطبيب يطلب طلب تمويل عشانها من الـ(BAMF)، واللي هي (Bundesamt für Migration und Flüchtlinge)، هي غالباً ما بتشترط يكون مع الطبيب إقامة، وممكن التقديم إلها على الفيزا أو على الـ(Fiktionsbescheinigung)، ولكن ممكن الموظف المسؤول عن الطلب في الـ(BAMF) يتزانخ يشترط يكون مع الطبيب إقامة.
مقالة من موقعنا:
🇩🇪 مجاناً: كيفية الحصول على تمويل لكورسات اللغة والتعديل الطبي
💡 وجود شهادة الـB2 شرط أساسي لتقديم طلب التمويل للدورات التحضيرية للـ(FSP)، وما بقبلوا الطلب بدونها
الدكتور محمد أبو عيد
سلبية طلب التمويل إنه بوخذ وقت حتى يردوا، من شهرين إلى أربع أشهر، ويعتمد على المدينة اللي ساكن فيها، يعني ما بزبط تكون ساكن بـ(Düsseldorf) وتقدم على طلب تمويل لدورة في معهد بمدينة (Köln)، أو العكس، غالباً رح يتم رفض طلب التمويل ورح يعرضوا عليكم تمويل دورات في المعاهد اللي في المدينة اللي أنتم ساكنين فيها، وهاد الشي بفسروه كنوع من العدالة بين المعاهد اللي في ألمانيا، لأنه غير هيك الكل بصير يطلب التمويل لدورات المعاهد الغالية، وبالتالي بقية المعاهد بتضرر.
تفاصيل زيادة بخصوص هاد الموضوع بتقدروا تفتحوا موقع الـ(Agentur für Arbeit)، أو موقع الـ(BAMF)، أو بتقدروا تسألوا المعاهد نفسها هل ممكن تقديم طلب تمويل للدورات اللي عندهم وشو الآلية.
• أنواع الدورات:
في دورات B2/C1-Medizin وفي دورات FSP-Vorbereitung:
– دورات (B2/C1-Medizin)
دورات الـ(B2/C1 Medezin) بتكون مدتها بين 7-8 أسابيع، هاي الدورات ابعدوا عنها، هاي الدورات موجهة وبتدرس مادة امتحان الـ(telc C1 Medizin)، لأنه بعض الولايات في ألمانيا بتطلب من خريجي دول الاتحاد الأوروبي شهادة (telc C1 Medizin)، وما بتطلب منهم يمتحنوا (FSP) عشان يوخذوا المزاولة، هي الدورات موجهة للي بده يمتحن (telc C1 Medizin). صحيح في تداخل بين مادة الـ(C1 Medizin) ومادة الـ(FSP)، ولكن خلال كورس بتم التركيز على تدريس مادة (telc) وحل تمارين (Hören) وتمارين (Lesen) وإلخ، وهي الأشياء ما نحتاجها، صح فيها فائدة من ناحية مصطلحات طبية وإثراء مستوى اللغة بشكل عام، ولكن أسبوعين دراسة ذاتية في البيت بتوخذ الزبدة لحالك بدون ما تدفع فلوس وتداوم 8 أسابيع في المعهد.
– دورات (FSP-Vorbereitung)
اللي بدنا إياه احنا ولازم ندور عليه، هي دورات الـ(FSP Vorbereitung)، هاي الدورات بتشرح عن امتحان الـ(FSP)، وبتم تدريبكم على الامتحان، وعمل محاكاة عن كيفية الامتحان، وبدربوكم كيف توخذوا (Anamnese) وتعملوا (Dokumentation) وتقدموا الحالة بالطريقة الصحيحة، وهاد الاشي اللي رح تواجهوه بالامتحان، بتعملوا أثناء الدورة (Simulationen) ومحاكاة للامتحان بين بعض ومع الـ(Dozent) تبع الدورة، وبس توخذوا (Anamnese) بتم تقييمكم وبحكوا لكم شو الأخطاء اللي عملتوها عشان ما تتكرر، وبتكتبوا (Brief) وبتم تصحيحه من الـ(Dozent) وبتعرفوا أخطاؤكم عشان ما تتكرر، وبتقدموا الحالات للـ(Dozent) وبتم تقييمكم وبتعرفوا الأخطاء عشان ما تكرروها. هي الدورة اللي بتوفر هاي الأشياء هي الدورة اللي بدكم إياها واللي يفضل تسجلوا فيها.
لكن الفكرة بهاي الدورات إنها تدريبية للامتحان، وبالتالي بتختلف من معهد لمعهد على حسب مدة الدورة. في معاهد اللي الدورة بتكون فيها 12-14 أسبوع بتم خلال الدورة تدريس مادة الـ(Fachsprache) بتعمق وبتعطيها حقها وبعدين بتبلش المحاكاة والتدريب عالامتحان. وفي المعاهد اللي مدة الدورة فيها بتكون 6 أسابيع بتمر على مادة الـ(Fachsprache) مرور الكرام، خلال أول أسبوع أو أسبوعين، وبتبدأ مباشرة مرحلة المحاكاة والتدريب عالامتحان، هاي الدورات بتتوقع إنك تكون دارس أساسيات الـ(Fachsprache) قبل ما تبلش الدورة، وإنك جاي عندهم عشان تستعد وتتدرب للامتحان مش جاي تدرس المادة عندهم. وفي معاهد بتوفر النوعين من الدورات، وإنت حر بالاختيار.
طبعاً الفائدة المتوقعة من هاي الدورات بتختلف من معهد لمعهد، فلازم قبل ما تسجلوا بأي معهد تقرأوا على موقع المعهد وصف الدورة ومخرجات التعلم، وبعدها تستشيروا حدا سجل قبلكم في المعهد، أو تفوتوا على الجوجل وتقرأوا الـ(Reviews) اللي على المعهد، أو تفتحوا صفحة الفيسبوك الخاصة بالمعهد وتقرأوا التعليقات، لأنه مش كل المعاهد بتلتزم بالوصف ومخرجات التعلم، عادي يكون الوصف اشي والواقع اشي ثاني.
ولكن لما الواحد يكون دارس مادة الـ(FSP) ومتمكن منها ومن مهارات الـ(Anamnese) والـ(Dokumentation) وكيفية تقديم الحالة، أثناء الدورة بقدر كل ما سنحت الفرصة إله في إنه يوخذ (Anamnese) بستغلها وبظل يكتب (Brief) ويطلب من الـ(Dozent) إنه يصحح له إياه، وبالتالي بقدر يستفيد من الدورة بأقصى قدر من الإمكان في حال كانت الدورة عكس التوقعات
يا ريت من الزملاء اللي أخذوا دورات في المعاهد يكتبوا عن تجربتهم في التعليقات، يكتبوا عن اسم المعهد، جودة التعليم، مخرجات التعلم والوقت والسعر وعدد الطلاب في الكورس الواحد.
2. الهوسبيتاسيون (Hospitation)
يعتمد على نقطتين رئيسيتين:
• النقطة الأولى: هل أنت جاهز تعمل Hospitation أو لا؟
المعظم وأنا كنت منهم بعتقد إنه بس يخلص الـ(B2) إنه ختم اللغة، وصار جاهز لكل اشي، وبقدر يلقي خطاب في الـ(Bundestag) ويوحد الشعب الألماني. لكن صدقاً الـ(B2) هو الجزء السهل في مرحلة الطبيب، الـ(Fachsprache) عالم ثاني، وكمية مصطلحات كبيرة وقواعد جديدة، بتختلف كلياً عن اللغة العامية اللي درسها الواحد قبل ما يمتحن B2، ما بدي أخوفكم ولكن هاي الحقيقة.
الفائدة من الـ(Hospitation) لامتحان الـ(FSP) كويسة وممكن تكون عظيمة وعظيمة جداً ولكن بشرط، إنه الطبيب يكون دارس مادة الـ(FSP) كاملة، ومتمكن من مهارات الـ(Anamnese) و(Dokumentation) و(Vorstellungsgespräch)، عشان لما يداوم ويحضر الـ(Morgengespräch) يكون فاهم شو الأطباء قاعدين بحكوا، ولما يلف راوند مع الدكاترة عالمرضى يكون فاهم شو بصير، وإذا فيه دخول جديد، يحاول يروح يوخذ (Anamnese) وبعدها يكتب الـ(Dokumentation)، ويشوف أحد المقيمين أو الأخصائيين عشان يصححوا له الـ(Brief)، هيك بكون هو عنجد قاعد بستفيد من الـ(Hospitation).
أما إنه الواحد يكون مخلص B2 جديد ويطلع على ألمانيا مباشرة على (Hospitation) بدون ما يكون فاتح ولا دارس مادة الـ(FSP) ومتمكن من المهارات الرئيسية، رح يكون زي الأطرش بالزفة، ويحس حاله ولا فاهم اشي، ويصير يشكك بقدراته وبلغته وإنه لا يفهم الألمانية، وبتهتز ثقته بنفسه، ورح يكون وجوده في الـ(Hospitation) زي عدمه، ورح يصير يضيع وقت على حاله ويصرف مصاري زيادة ويأخر بحاله وهو المتضرر الأول. كثير من الزملاء ما فتحوا مادة الـ(FSP)، وبلشوا أول ما وصلوا ألمانيا (Hospitation) في أقسام (Kardiologie) وفي مستشفيات محترمة جداً وحواليهم أخصائيين ومقيمين عرب، ولكن كانوا زي الطرشان في الزفة، في منهم كابَروا وظلهم مكملين الشهر والشهرين والثلاث، وضيعوا على حالهم الوقت، وفي منهم اعترفوا إنهم شغالين خطأ وقبلوا الواقع وعملوا الصح وقرروا يوقفوا (Hospitation) حتى يدرسوا مادة الـ(FSP) ويتمكنوا من المهارات الأساسية، وبعدها في منهم رجع عمل (Hospitation) وبعدها امتحن ونجح، وفي منهم أخذوا دورات (FSP Vorbereitung) وامتحن ونجح، ومنهم اللي كمل دراسة لحاله ونجح.
💡 الصح أنه الواحد يدرس مادة الـ(FSP) ويتمكن من المهارات كلها بعدين يداوم (Hospitation)، غير هيك حكي فاضي وتضييع للجهد والوقت والفلوس.
الدكتور محمد أبو عيد
تضييع الفلوس بأنه الشخص رح يضيع شهر وشهرين بالـ(Hospitation)، ورح يدفع أجار ومصاريف، وبكون بأخر حاله إنه ينجز ويكون جاهز ويمتحن (FSP).
• النقطة الثانية: تتعلق بالمستشفى اللي رح تعمل فيه الـ(Hospitation)
لما المستشفى يكون عليه ضغط كبير، الأخصائيين والمقيمين بكون همهم الأول والوحيد إنهم يخلصوا الشغل تبعهم، فمن المنطقي إنهم ما يعيروك أي اهتمام، والبعض منهم رح يستغل وجودك ويطلبوا منك تروح تسحب دم من المرضى عشان تشيل عنهم شوية حمل وهم يقدروا يخلصوا مسؤولياتهم الأخرى، وما رح تلاقي حدا فاضي يصحح لك الـ(Brief) اللي رح تكتبوا، فتُقتصر الفائدة على ممارسة اللغة بشكل أو بآخر أثناء الدوام مع المرضى، ولكن الفائدة الحقيقية إنت بدك إياها غير موجودة.. فالأفضل تشوفوا مستشفى أو قسم إلكم معارف فيه، لأنه ممكن هم اللي يهتموا فيكم مزبوط، هيك بكون الوضع ممتاز. والأفضل إنه تختاروا مستشفى ما عليه ضغط كبير، ببين من عدد الأسرة اللي في المستشفى، وتختاروا أقسام ما عليها ضغط. مش لازم تعمل الـ(Hospitation) في قسم الباطني أو الجراحة العامة فقط، ومش لازم تعمل الـ(Hospitation) في مستشفى جامعي.
ممكن تعمل الـ(Hospitation) في قسم (Rehabilitation) أو قسم (Neurologie) وتستفيد أكثر بكثيييير من اللي بعملوا (Hospitation) في الأقسام اللي عليها ضغط، غير إنه كونك في المستشفى بصفتك (Hospitant) بتقدر تتحرك في المستشفى براحتك، وممكن (وبعيد ممكن) إنك تقدر تفوت على بعض مرضى الأقسام الثانية، وتوخذ منهم (Anamnese)، أو بتقدروا تيجوا أثناء المناوبة وقتها وتقعدوا بالطوارئ وتحاولوا تستفيدوا.
وفي كمان الـ(Hausarztpraxis/Hausarztzentrum)، هاي بتكون عيادة (Family Medicine) أو مركز صحي، بكون فيها أخصائيين أعدادهم من اثنين لحد 6، بكونوا بالعادة (Innere Medizin) وإذا كان المركز كبير ممكن يكون فيه أخصائي (Allgemein Chirurgie)، وفي طاقم تمريضي وكل اشي، ممكن تشوفوا هاي الفرصة لأنها منتشرة بكثرة في المدن خاصة الصغيرة، فتلاقوا اشي قريب عنكم، ودوامهم دوام وزراء (مريح جداً)، فبتوفروا تعب الروحة للمستشفيات اللي ممكن تكون في مدن ثانية، في عدة زملاء عملوا فيها (Hospitation) وانبسطوا بالنتيجة واستفادوا كويس ووفروا على حالهم وقت وتعب التنقل من مدينة لمدينة، ولكن كل ما كان الـ(Hausarztzentrum) أكبر كانت الفائدة أكبر.
مقالات من موقعنا:
🇩🇪 السفر إلى ألمانيا من خلال الحصول على هوسبيتاسيون (فترة تدريب في مستشفى):
– – ما هو الهوسبيتاسيون؟
– – كيف تحصل على الهوسبيتاسيون من خلال المراسلات؟
3. الدراسة الذاتية
هاي الطريقة الأوفر مادياً بدون شك، ولكنها الأصعب واللي محتاجة جهد أكبر.
ممكن الواحد يدرس المادة لحاله في البيت، وما يوخذ دورة تحضيرية ولا يعمل (Hospitation)، ولكن عشان الواحد يستفيد، بعد ما يخلص مادة الـ(FSP) ويتكمن من مهارات الـ(Anamnese) والـ(Dokumentation)، لازم يصير يعمل (Simulationen)، وبالتالي ما بقدر يكون لحاله بهاي الخطوة، محتاج زملاء ثانيين يصيروا يعملوا (Simulationen) مع بعض، يصححوا لبعض، ويتعلموا من أخطاء بعض، وممكن يستعينوا بزملاء لإلهم يكون ممتحنين ومخلصين ومن فترة لفترة يعملوا معهم (Simulation) كامل عشان تصحيح الأخطاء اللغوية اللي بتصير أثناء الـ(Anamnese) وكتابة الـ(Dokumentation)، وتقديم الحالة.
مقالة مفصلة عن ملخصات امتحانات (FSP) و(KP):
🇩🇪 ملخصات لإمتحانات Fachsprachenprüfung (FSP) und Kentnissprüfung (KP)
💡 لكن صدقاً الطبيب بعد ما يبلش دوام بكون وقته مضغوط جداً ومسؤولياته كبيرة، وبالتالي مش من السهل تلاقوا زميل أكبر منكم يوفر لكم هاي المساعدة، وما تزعلوا من حدا إذا أعتذر منكم أو وعدكم يساعدكم وبعدها ما قدر.
الدكتور محمد أبو عيد
• الخلاصة
- مش لازم اعمل (Hospitation) عشان أنجح بامتحان الـ(FSP)، بقدر أنجح بدونه.
- مش لازم أعمل (FSP Vorbereitungskurs) عشان أنجح بامتحان الـ(FSP)، بقدر أنجح بدونها
- وبقدر أستعد وأنجح بالامتحان بخطوة وحدة من اللي فوق، وبقدر أعمل الـ3 خطوات معاً.
💡 لكن بغض النظر عن الخطة اللي رح تعتمدوها، لازم الكل يبدأ بدراسة مادة الـ(FSP) بعد ما يحصل شهادة الـ(B2)، ونصيحة أخوية إنكم تبلشوا بالمادة وأنتم في بلدكم، وتخلصوها وتتمكنوا منها قبل ما تسافروا على ألمانيا، هيك بتوفروا وقت وفلوس على حالكم، ما في داعي للاستعجال ومسابقة الريح في الطلعة على ألمانيا، ألمانيا ما رح تهرب.
الدكتور محمد أبو عيد
• المقالة طوبلة ولكن…
نصيحة أخوية كنت أتمنى إني لقيتها قبل ما أسافر على ألمانيا، وفي هاي النصيحة إرشاد وتوفير كبير للجهد والوقت والفلوس. بالأخير أنت أولى بكل قطرة عرق، وبكل دقيقة وبكل قرش بتقدر توفرهم على حالك. لهيك ضروري جداً أي حدا مخطط يطلع ويسافر لألمانيا يقرأ اللي فوق ويعرف شو اللي بستناه، شاركوا المقالة مع زملائكم وزميلاتكم.
كل الشكر لكاتب هذه المقالة الدكتور محمد أبو عيد 😍💐😊
• سلسلة مقالات نجاحك أكيد مع الدكتور أبو عيد:
ننصحكم بشدة بقرائتها وذلك لانها ستزيد من فهمكم لمواضيع عديدة وبالتالي فرص نجاحكم في تعلم اللغة الألمانية والامتحانات والعمل. جمعناها كلم في المقالة التالية:
• سلسلة مقالات “نجاحك أكيد مع الدكتور أبو عيد”
هل تريد معلومات أكثر؟ عندك أسئلة؟
إنضم الآن (🇩🇪 JETZT) لكل جروباتنا
(الروابط موجودة في آخر الصفحة إذا كنت تتصفح من الهاتف وعلى يسار الصفحة إذا كنت تتصفح من الحاسوب)