بخصوص السفر على ألمانيا بشهادة الـ A2 أو شهادة الـ B1

• مقدمة:

“إن الله يحب إذا عمل أحدكم عملًا أن يتقنه”، فلما بدك تنصح حدا لازم تتقن النصيحة، أو ما تنصح وتترك النصيحة لأهلها.

ما بزبط حدا ينصح الناس بناء على تجربة مر فيها ويعممها، ولسا بالأصل ما اكتملت التجربة ولسا ما امتحن FSP ونجح فيه عشان يقدر ينقل الصورة كاملة بشكل صحيح للناس، ويوضح إيجابيات وسلبيات تجربته ويعطي أرقام، لأنه ممكن الناس توخذ قرارات مصيرية بناء على كلامه.

ما بصير تعلل عدم نجاحك في امتحانات اللغة بأنه المعاهد اللي بالأردن امتحاناتها تعجيزية وهدفها فقط جمع الفلوس، وأنه شغلها هبل وضحك ونصب.

إذا كان لديك أية شكوك أو تحتاج إلى مزيد من التوضيح، فلا تتردد في طرح الأسئلة في أي وقت في المجموعة الرئيسية لمجتمع فاخ آرتست يتست (Facharzt JETZT) على الفيسبوك والتيليجرام (سيتم إضافة جميع مجموعات التيليجرام كفولدر). هذه المقالة هي لمساعدتك على فهم الأمور، ولكن مع ذلك، لا ينبغي أن تكون مصدرك الوحيد. دائماً استشر المواقع الرسمية للحصول على المعلومات الأكثر دقة وتحديثاً (يمكنك قراءة إخلاء المسؤولية الكامل هنا).

• خلاصة تجربة أكثر من 50 طبيب أردني

الكلام اللي تحت خلاصة تجربة أكثر من 50 طبيب خريجي الجامعات الأردنية وغيرها طلعوا خلال سنة الـ2021 وسنة الـ2022.

• شهادة اللغة

نهائيًا ما بتعكس مستوى صاحبها، ممكن شخص يكون معه شهادة B2 ومستواه A2 أو B1 وهاذ حال غالبية خريجي المعاهد العادية في ألمانيا، وممكن شخص مستواه أعلى من الـB2 ولكن لما امتحن ما مشت أموره.

الشهادة تعكس فقط إنه إنت كشخص بتعرف تتصرف وتمشي أمورك في الامتحان، ممكن يكون معك B2 وما تعرف تمشي حالك في الـBahnhof.

معاهد اللغة في ألمانيا اللي بتعطي مستوى الـB2 كامل خلال 6-7 أسابيع وسعر الدورة 500 يورو وبتحط 25-30 طالب في المحاضرة، جودة التعليم فيها جدًا سيئة ومخرجات التعلم فيها مش اشي بالمرة.

صحيح الامتحانات عندهم أسهل من الأردن، وهاي النقطة بعترف فيها، ولكن بالنسبة للمعاهد الألمانية بالأخير هاد الامتحان امتحان المعهد فقط ومش معتمد عالميًا ولا حتى معتمد للجامعات في ألمانيا وفي عدة ولايات (غير الـNRW) مركز المعادلة فيها ما بقبل غير شهادات Goethe/ÖSD/telc، حتى بالـNordrhein-Westfalen في بعض الزملاء انرفضت شهادة المعهد وكثير تغلبوا عبين ما قدروا يحلوا الموضوع والموظف يقبل شهادتهم، وفي منهم ما مشت أمورهم واضطروا بالأخير يمحتنوا امتحاناتGoethe/ÖSD/TELC.

المعاهد هاي رزقتها ورأس مالها هي امتحانتها السهلة نوعًا ما، لأنه لو امتحانهم كان بصعوبة امتحانات Goethe/ÖSD/telc، ما حدا رح ييجي عندهم والناس رح تروح تمتحن في المراكز الرسمية لـGoethe/ÖSD/telc، ما دام الامتحان بنفس الصعوبة والامتحانات هاي معتمدة رسميًا.

وفي حال طلبة المعاهد هاي بعد ما أخذوا الدورة راحوا امتحنوا امتحانات Goethe/ÖSD/telc، ولا طالب وبعيدها مرة ثانية ولا طالب، وبعيدها مرة ثالثة ولا طالب من طلبة المعاهد هاي رح ينجح في هاي الامتحانات، باستثناء اللي بتعب على حاله وبدرس بحق الله وهاد ما بحتاج يوخذ كورس في هاي المعاهد.

في الأردن الامتحانات هي امتحانات عالمية ومعتمدة على مستوى العالم، ومراكز الامتحانات لازم تتقيد بالمواصفات والمعايير المطلوبة.

• اللي بصير مع الناس في الأردن:

(1) الفرق بين المعاهد:

 إنه بختار معهد عادي، أو ما بتوفق باختيار المعهد، متوسط المعاهد العادية في الأردن الدورة بتكلف بين 130-170 دينار، وفي جوته الدورة بتكلف 205 دينار، فالفرق بين معهد جوته والمعاهد الثانية تقريبًا 30-70 دينار للدورة الوحدة، ولكن الناس ما بتحب تدفع، ما بحكي عن الناس اللي وضعها المادي صعب، هذول ممكن يدرسوا لحالهم في البيت ويكون مستواهم أفضل بالمقارنة في حال أخذوا دورات بمعاهد سيئة، ووقتها بوفروا على حالهم الفلوس اللي رح يدفعوها.

(2) الطريقة الصحيحة لدراسة اللغة:

معظم الناس ما بتدرس كويس، أو ما بتعرف الطريقة الصحيحة لدراسة اللغة، بتعتقد إنه الدورة لحالها كافية، وبغيب عنهم إنه الدورة مكان لممارسة اللغة والتمكن من المهارات وتصحيح الأخطاء، لما كنت آخذ في معهد جوته، كان بنهاية كل دورة في امتحان، وبعطوك علامة من 100 بناء على تقييمهم إلك وأداءك أثناء الدورة والامتحان اللي بنهاية الدورة، واللي وكانت علامة النجاح 70 بالدورة، كثير من الطلاب كانوا يجيبوا أقل من 70 والمعهد ينصحهم يعيدوا الدورة لأنهم مش متمكنين من مخرجات التعلم والمهارات الخاصة بالمستوى، ولكن كانوا ما يسمعوا النصيحة ويسجلوا بالمستوى اللي بعده، ونفس الاشي يصير بالمستوى اللي بعده، وبس يمتحنوا B2 وما ينجحوا بصيروا يحكوا المعهد امتحانه تعجيزي وهم المعهد يلم مصاري منه.

(3) عدم الاستعجال:

في ناس بتكون مستعجلة، وما بتعطي اللغة حقها، بكون يا دوب خلص دورة الـB1 وما كان يدرس كويس وبلش بدورة الـB2، واخبط بصير حاجز امتحانB2 وببطل يدرس ويطور من مهاراته اللغوية وبركز فقط على الامتحان، وبحاول مرة ومرتين وثلاث وما بنجح، وبصير يتحجج إنه الامتحانات صعبة، وما بحكي أنا والله لسا مش متمكن من مستوى الـB1 فكيف بدي أنجح بالامتحان تبع الـB2.

بعرف زملاء بالأردن أخذوا بمعاهد عادية، بس أعطوا اللغة حقها ومن أول مرة نجحت بامتحان الـB2 بمعهد جوته بالأردن، وكل علاماتها كانت فوق الـ90، ولو كانوا امتحنوا C1 كانوا نجحوا فيه.

وبعرف زملاء ما أعطوا اللغة حقها واضطروا يمتحنوا الـB2 بالأردن 5 مرات عبين ما نجحوا، طبعًا اللي ما بعطي اللغة حقها وبستعجل بالامتحان وبحاول أكثر من مرة وبمتحن عبين ما ينجح، بعتقد إنه صار معلم لغة، ولكن بس يجي على ألمانيا ويشوف لغته بصير يلطم ويضرب أخماس بأسداس وبصير يفكر إنه يوخذ دورة B2 مرة ثانية أو يوخذ دورة C1.

وفي من الزملاء اللي ما أعطوا اللغة حقها وبعد عدة محاولات في الأردن ما نجح، وأجا على ألمانيا عشان يمتحنB2 في المعاهد السهلة، فبوخذوا دورة B2 وبمتحنوا وبنجحوا، وبصيروا يحكوا إنه الامتحانات بألمانيا منطقية ومش تعجيزية، وبنسوا إنه تراكمت عندهم مهارات لغوية وهم بدرسوا وبمتحنوا في الاردن، ومع سهولة الامتحان في ألمانيا من البديهي إنهم ينجحوا، ومن الطامة الكبرى إذا رسبوا.

ولكن احنا دائمًا بنحب نفسر عدم نجاحنا أو فشلنا على أي حدا وما بنحب نتحمل مسؤولية أخطائنا، دائمًا بندور على شمّاعة نعلق فشلنا عليها.

وفي منهم بستعجل وبسجل لامتحان الFSP، وللأسف ما بنجح، وبصير يحط الحق على اللجنة تبعت الامتحان وإنه الحالة كانت صعبة والمريض بحكي بسرعة وبشكل مش واضح، وما بحكي أنه هو مش متمكن من أساسيات اللغة في المستوى المطلوب وإنه استعجل، وبضطر يستنى كمان 3-4 أشهر عشان يمتحن مرة ثانية وللأسف ممكن ما ينجح، وقتها بكتئب وبصير يفكر إنه خيار ألمانيا كان من الأساس خطأ وكان لازم ظل ببلده أو اختار طريق ثانية أو أو أو…

بعرف زملاء أعطوا اللغة حقها، امتحنت ونجحت بسهولة من أول محاولة في مونستر اللي يعتبر من أصعب إذا لم يكن أصعب مركز امتحان في ألمانيا، وحاليًا بشتغلوا بأكبر المستشفيات الجامعية.

وبعرف زملاء ما أعطوا اللغة حقها وما نجحوا في امتحان الـB2 في الأردن واستعجلوا بالقدوم لألمانيا وامتحنوا الB2 في المعاهد السهلة، واستعجلوا بحجز امتحان الـFSP، واضطروا يعيدوه 4 مرات عبين ما نجحوا في دوسيلدورف واللي هو يعتبر مركز الامتحان الأسهل في الNRW.

اللي بحكي إنه امتحانات معاهد اللغة الألمانية المعتمدة في الأردن هدفها مادي بحت وإنهم فقط بدهم يلموا مصاري من الناس، فنصح الناس إنها تطلع على الA2، هل بوضح قديش رح يدفع تكاليف القعدة بألمانيا لما يوخذ دورة B1 وبعدها دورة B2.

• التكاليف كالتالي

غير تكاليف الكورسات، وقيس على ذلك بقية الأشهر، هاد الحكي طبعًا في حال ما اضطر لمصاريف جانبية.

معاهد اللغة بألمانيا اللي بتعطي بحق الله والتعليم فيها ممتاز، ممكن يكلف المستوى الواحد فيها 1200 يورو.

يعني خلال الأربع أشهر هاي ممكن يضيع 3500 يورو من الحساب المغلق غير تكاليف الكورسات، ويضيع أربع أشهر من فترة فيزا المعادلة والبحث عن عمل.

بعدها بصير يفكر شو يعمل، يدور على Hospitation ولا يسجل بدورة تحضيرية ولا يعمل الثنتين، ولا يبلش يدرس لحاله في البيت لامتحان الـFSP وبعدها يمتحن مباشرة ولا بعد الدراسة يعمل Hospitation ولا يسجل بدورة تحضيرية، فبضيع الوقت عليه وهو بفكر.

• مدة الدراسة من المنزل

اللي بقرر يقعد بالبيت يدرس بده 3 أشهر دراسة مادة الـ FSP، وممكن يتأخر عبين ما يسجل للامتحان لأنه لسا مش عارف رأسه من رجليه، فبعد شهر ونص من الدراسة بسجل في الامتحان وبوخذ موعد ب3-4 أشهر، ومع الـ 4 أشهر اللي ضاعوا عبين ما امتحان B2 والشهر ونص اللي راحوا وهو بدرس وال3-4 أشهر اللي رح يستناهم عبين ما يجي موعد امتحانه، يعني بعد 9-10 أشهر من دخوله لألمانيا بمتحن وبكون دفع 8-9 آلاف يورو من الحساب المغلق، وإذا بده بعد الدراسة في البيت يعمل Hospitation أو يوخذ دورة تحضيرية هاي كمان شهرين رح يروحوا منه، وإذا طلعت الدورة التحضيرية مش بزيادة بتكون تضييع وقت وفلوس، فبكون موعد امتحان بعد 10-11 شهر من دخوله لألمانيا وبكون دفع 10-11 ألف يورو من الحساب المغلق، وفي حال لا سمح الله ما نجح، وهاد الاشي ممكن يصير مع الكل، بده يستنى كمان 3-4 أشهر عبين ما يجي موعد جديد، وبكون وقتها الحساب المغلق بكون تصفّر والـ 12 شهر خلصوا والإقامة تبعته خلصت، وعشان يجددوا له إياها بده يودع كمان مبلغ معين في الحساب المغلق وبناء على المبلغ اللي يودعه بمددوا له إقامته.

طبعًا نفسيًا لما يشوف الواحد حاله صرلوا أكثر من سنة في ألمانيا وما خلص امتحان الـ FSP بصير يقارن حاله بزملاؤه ويلوم حاله ويصير يشكك بقراره بالقدوم لألمانيا.

غالبية الزملاء اللي طلعوا من الأردن على الـ B2 أخذوا من 6 إلى 8 أشهر عبين امتحنوا الـ FSP ونجحوا وأخذوا الـ Approbation، واللي ما نجح من أول مرة قعد سنة، واللي ما نجح من ثاني مرة قعد سنة وأربع أشهر.

فاللي بده يطلع عالـB1 بده يضيف شهرين للمدة اللي فوق.

واللي بده يطلع عالـA2بده يضيف كمان 4 أشهر للمدة اللي فوق.

قلة قليلة وبنعدوا على عدد الأصابع اللي طلعوا على الB2 وامتحنوا FSP وأخذوا الـApprobation خلال أقل من 6 أشهر، أسرع حدا بعرفه كان خلال 4 أشهر، وهاد الشخص كان خاتم مادة الـFSP وحافظها عن ظهر قلب قبل ما يوصل ألمانيا، وقعد 4 أشهر يعمل Hospitation قبل الامتحان.

فما بصير بتنصح حدا شو يعمل بعبارة أو عبارتين، وما توضح شو الإيجابيات والسلبيات الخاصة بنصحيتك.

وما تكون أنتَ أو تكونِ إنتِ ساذجة وتسمعي كلام أي حدا أو توخذي برأي واحد فقط، دائمًا شوفوا عدة تجارب وأوزنوا الإيجابيات والسلبيات للتجارب هاي وبعدها قرروا.

للأسف مش كل الزملاء اللي بتخوض تجربة خاطئة بتحب تحكي، الغالبية بكابروا على حالهم ويعلقوا فشل تجربتهم على أي اشي غير إنهم يلوموا حالهم.

ومش كل الزملاء اللي بتخوض تجربة ناجحة بتحب تشاركها، بعرف ناس طلعت على ألمانيا عالـ A2 وناس طلعوا عالـ B1 وخلصت الفيزا وخلص الحساب المغلق ولسا ما أخذوا الـ Approbation، وبعضوا أصابعهم ندم إنهم طلعوا عالـ A2 أو عالـ B1.

كل اللي قابلتهم طالعين عالـA2 أو عالـB1، بحكوا لو يرجع فيهم الوقت ما بطلعوا على ألمانيا غير عالـB2.

وكل اللي طلعوا عالـB2 (وأنا أولهم) بحكوا لو يرجع فيهم الوقت ما بطلعوا على ألمانيا غير تا يكونوا خاتمين مادة الـFSP عن ظهر قلب بالأردن عشان يمتحنوا بأسرع وقت ممكن وما يضيعوا وقت وفلوس بألمانيا كل يورو بتقدر توفره إنت أولى فيه، وكل وقت إنت بتقدر تختصره إنت أولى فيه.

اللي بتعب على حاله وبعطي اللغة حقها بلاقي نتيجة تعبه وجهده بس يوصل ألمانيا، وبلاقي نتيجة تعبه وجهده بس يمتحن FSP وبلاقي نتيجة تعبه وجهده بس يبلش شغل في المستشفيات.

والمهمل اللي ما بتعب على حاله وما بعطي اللغة حقها بلاقي نتيجة إهماله بس يوصل ألمانيا، وبلاقي نتيجة إهماله بس يمتحن FSPوبلاقي نتيجة إهماله بس يبلش شغل في المستشفيات، وممكن يطول كثير عبين ما مستشفى يوظفه، ورح يظل يعلق سبب تأخره وعدم نجاحه على غيره.

ما في داعي للاستعجال ومسابقة الريح في الطلعة على ألمانيا، ألمانيا ما رح تهرب.

نهائيًا لا تمتحن B2 بدون ما تكون دارس المستوى سواء بمعهد أو بالبيت ومتكمن منها، ولا تسمع نصيحة اللي بحكيلك خلينا نمتحن ونجرب حظنا، ممكن اليوم تكون محظوظ بالامتحان ويوم الامتحان المهم (FSP) الحظ ما يسعفك.

كل الشكر لكاتب هذه المقالة الدكتور محمد أبو عيد له كل الشكر 😍💐😊

نرغب الآن في التعرف على خبراتك:
أي الأفضل بالنسبة للأطباء: الولايات المتحدة الأمريكية أم ألمانيا؟

• سلسلة مقالات نجاحك أكيد مع الدكتور أبو عيد:

ننصحكم بشدة بقرائتها وذلك لانها ستزيد من فهمكم لمواضيع عديدة وبالتالي فرص نجاحكم في تعلم اللغة الألمانية والامتحانات والعمل. جمعناها كلم في المقالة التالية:

• سلسلة مقالات “نجاحك أكيد مع الدكتور أبو عيد”

هل تريد معلومات أكثر؟ عندك أسئلة؟
إنضم الآن (🇩🇪 JETZT) لكل جروباتنا
(الروابط موجودة في آخر الصفحة إذا كنت تتصفح من الهاتف وعلى يسار الصفحة إذا كنت تتصفح من الحاسوب)