• مقدمة
كثير من الزملاء والزميلات بسألوا شو أحسن اشي أعمله لامتحان الـFSP وشو أفضل طريقة للتحضير لامتحان الـFSP.
إذا كنت لا تعرف كيفية التقديم على الأبروباتسيون، شرحنا لكم ذلك في أكثر مقالة مفصلة على الإنترنت: “خطوات التخصص الطبي في ألمانيا: الدليل الأشمل والأحدث على الإنترنت“
• إذا كنت تملك الأبروباتسيون، هناك خبير توظيف ألماني يمكن أن يجد وظيفة لك. اضغط يتست (الآن) هنا).
• إذا كان لديك أية شكوك أو تحتاج إلى مزيد من التوضيح، فلا تتردد في طرح الأسئلة في أي وقت في المجموعة الرئيسية لمجتمع فاخ آرتست يتست (Facharzt JETZT) على الفيسبوك والتيليجرام.
• هذه المقالة هي لمساعدتك على فهم الأمور، ولكن مع ذلك، لا ينبغي أن تكون مصدرك الوحيد. دائماً استشر المواقع الرسمية للحصول على المعلومات الأكثر دقة وتحديثاً (يمكنك قراءة إخلاء المسؤولية الكامل هنا).
– أدرس لحالي في البيت؟
– ولا أداوم Hospitation؟
– ولا آخذ دورة تحضيرية للامتحان؟
نقلًا عن تجارب العديد من الزملاء في امتحان الـFSP
• الإجابة عن إيش أفضل اشي أعمله للتحضير لامتحان الـFSP؟
الجواب بنفع تعمل الثلاث وبنفع تكتفي بوحدة من الثلاث:
في زملاء أخذوا دورات تحضيرية وعملوا Hospitation وبحمد الله وتوفيقه نجحوا من أول محاولة. ومنهم للأسف اضطروا يعيدوا الامتحان كمان مرة.
وفي زملاء أخذوا فقط دورة تحضيرية وما عملوا Hospitation، وبحمد الله وتوفيقه نجحوا من أول محاولة. ومنهم للأسف ما توفقوا واضطروا يعيدوا الامتحان كمان مرة.
وزملاء قعدوا يدرسوا لحالهم في البيت، ولا أخذوا دورة تحضيرية ولا عملوا Hospitation. وبحمد الله وتوفيقه نجحوا من أول محاولة. وفي منهم للأسف اضطروا يعيدوا الامتحان كمان مرة. منهم اللي عمل Hospitation ومنهم اللي عمل دورة تحضيرية قبل المحاولة الثانية، وبعدها بحمد الله وتوفيقه نجحوا.
في البداية لازم تفهموا طبيعة امتحان الـFSP، في فيديوهات عاليوتيوب بتشرح عن كيفية الامتحان وآلية التقييم. وبعملوا محاكاة بين طبيب ومريض اشي مقارب للامتحان، حلو إنكم تشوفوا هذه الفيديوهات عشان توضح الصورة.
رح أشرح عن الامتحان في منشور منفصل عشان ما يطول هاد المنشور
رح أحكي في البوست عن إيجابيات وسلبيات كل وحدة فيهم حسب تجربتي وتجارب الزملاء اللي بعرفهم
(1) الدورات التحضيرية لامتحان الـFSP؟
الدورات في ألمانيا عدة أنواع، والأسعار بتراوح متنوعة، في ب500 يورو وفي ب1000 يورو، وفي ب2000 يورو وفيه ب3500 يورو.
مش دائمًا الحكي هاد صحيح، ولكن بالنسبة لهاي الدورات في ألمانيا حسب التجربة الغالي سعره فيه. وشو ما دفعت زيادة بتلاقي، وفي خيارات متنوعة بتقدر تختار اللي بناسبك.
ولكن كل ما زاد سعر الكورس، قل عدد الطلاب المشاركين، زادت نسبة مشاركة الطالب الواحد خلال الكورس. وزادت الفائدة، وبالعكس، كل ما قل سعر الكورس رح تلاقي عكس المعطيات اللي فوق.
الكورس اللي ب3500 يورو ممكن تلاقي فيه 6 طلاب.
والكورس اللي ب500 يورو ممكن تلاقي فيه 30 طالب.
في دورات ممكن إنه الطبيب يطلب طلب تمويل عشانها من الـAgentur für Arbeit، ولكن بشترطوا إنه الطبيب يكون معه Aufenthaltstitel (الإقامة)، وهاد الاشي ممكن يوخذ من 3 ل6 أشهر من وصول الطبيب لألمانيا.
وفي دورات ممكن إنه الطبيب يطلب طلب تمويل عشانها من الـ BAMF، واللي هي Bundesamt für Migration und Flüchtlinge، هاي غالبًا ما بتشترط إنه الطبيب يكون معه إقامة، وممكن التقديم إلها على الفيزا أو على الـ Fiktionsbescheinigung، ولكن ممكن الموظف المسؤول عن الطلب في الـ BAMF يتزانخ يشترط إنه الطبيب يكون معه إقامة.
طبعًا وجود شهادة الـ B2 شرط أساسي لتقديم طلب التمويل للدورات التحضيرية للـFSP، وما بقبلوا الطلب بدونها.
سلبية طلب التمويل إنه بوخذ وقت عبين ما يردوا، من شهرين إلى أربع أشهر. وبعتمد على المدينة اللي الواحد ساكن فيها. يعني ما بزبط تكون ساكن بDüsseldorf وتقدم على طلب تمويل لدورة في معهد بمدينة Köln، أو العكس. غالبًا رح يتم رفض طلب التمويل ورح يعرضوا عليكم تمويل دورات في المعاهد اللي في المدينة اللي أنتم ساكنين فيها. وهاد الاشي بفسروه كنوع من العدالة بين المعاهد اللي في ألمانيا. لأنه غير هيك الكل بصير يطلب التمويل لدورات المعاهد الغالية، وبالتالي بقية المعاهد بتضرر.
• بخصوص أنواع الدورات لامتحان الـFSP، في نوعين من الدورات اللي رح تلاقوها لامتحان الـFSP؟:
في دورات B2/C1 Medizin وفي دورات FSP Vorbereitung:
• دورات الـ B2/C1 Medezin
بتكون مدتها بين 7-8 أسابيع، هاي الدورات ابعدوا عنها. هاي الدورات موجهة وبتدرس مادة امتحان الـ telc C1 Medizin، لأنه بعض الولايات في ألمانيا بتطلب من خريجي دول الاتحاد الأوروبي شهادة telc C1 Medizin، وما بتطلب منهم يمتحنوا FSP عشان يوخذوا المزاولة، فهاي الدورات موجهة للي بده يمتحن telc C1 Medizin.
صحيح في تداخل بين مادة الـ C1 Medizin ومادة الـ FSP. ولكن خلال كورس بتم التركيز على تدريس مادة telc وحل تمارين Hören وتمارين Lesen وإلخ، وهاي الأشياء ما نحتاجها من مرة. صح فيها فائدة من ناحية مصطلحات طبية وإثراء مستوى اللغة عمومًا. ولكن أسبوعين دراسة ذاتية في البيت بتوخذ الزبدة لحالك بدون ما تدفع فلوس وتداوم 8 أسابيع في المعهد.
اللي بدنا إياه احنا ولازم ندور عليه، هي دورات الـ FSP Vorbereitung.
• دورات الـ FSP Vorbereitung
هاي الدورات بتشرح عن امتحان الـ FSP، وبتم تدريبكم على الامتحان، وعمل محاكاة عن كيفية الامتحان. وبدربوكم كيف توخذوا Anamnese وتعملوا Dokumentation وتقدموا الحالة بالطريقة الصحيحة. وهاد الاشي اللي رح تواجهوه بالامتحان، بتعملوا أثناء الدورة Simulationen ومحاكاة للامتحان بين بعض ومع الـ Dozent تبع الدورة، وبس توخذوا Anamnese بتم تقييمكم وبحكوا لكم شو الأخطاء اللي عملتوها عشان ما تتكرر، وبتكتبوا Brief وبتم تصحيحه من الـ Dozent وبتعرفوا أخطاؤكم عشان ما تتكرر، وبتقدموا الحالات للـ Dozent وبتم تقييمكم وبتعرفوا الأخطاء عشان ما تكرروها.
• الدورة اللي بتوفر هاي الأشياء هي الدورة اللي بدكم إياها واللي يفضل تسجلوا فيها.
ولكن الفكرة بهاي الدورات إنها تدريبية للامتحان، وبالتالي بتختلف من معهد لمعهد على حسب مدة الدورة.
في معاهد اللي الدورة بتكون فيها 12-14 أسبوع بتم خلال الدورة تدريس مادة الـ Fachsprache بتعمق وبتعطيها حقها وبعدين بتبلش المحاكاة والتدريب عالامتحان.
في المعاهد اللي مدة الدورة فيها بتكون 6 أسابيع بتمر على مادة الـ Fachsprache مرور الكرام. خلال أول أسبوع أو أسبوعين، وبتبدأ مباشرة مرحلة المحاكاة والتدريب عالامتحان، هاي الدورات بتتوقع إنك تكون دارس أساسيات الـ Fachsprache قبل ما تبلش الدورة. وإنك جاي عندهم عشان تستعد وتتدرب للامتحان مش جاي تدرس المادة عندهم.
• وفي معاهد بتوفر النوعين من الدورات لامتحان الـFSP؟، وإنت حر بالاختيار.
طبعًا الفائدة المتوقعة من هاي الدورات بتختلف من معهد لمعهد، فلازم قبل ما تسجلوا بأي معهد تقرأوا على موقع المعهد وصف الدورة ومخرجات التعلم. وبعدها تستشيروا حدا سجل قبلكم في المعهد، أو تفوتوا على الجوجل وتقرأوا الـ Reviews اللي على المعهد. أو تفتحوا صفحة الفيسبوك الخاصة بالمعهد وتقرأوا التعليقات، لأنه مش كل المعاهد بتلتزم بالوصف ومخرجات التعلم، عادي يكون الوصف اشي والواقع اشي ثاني.
ولكن لما الواحد يكون دارس مادة الـ FSP ومتمكن منها ومن مهارات الـ Anamnese والـ Dokumentation وكيفية تقديم الحالة. أثناء الدورة بقدر كل ما سنحت الفرصة إله في إنه يوخذ Anamnese بستغلها وبظل يكتب Brief ويطلب من الـDozent إنه يصحح له إياه. وبالتالي بقدر يستفيد من الدورة بأقصى قدر من الإمكان في حال كانت الدورة عكس التوقعات.
يا ريت من الزملاء اللي أخذوا دورات في المعاهد يكتبوا عن تجربتهم في التعليقات، يكتبوا عن اسم المعهد. جودة التعليم، مخرجات التعلم، الوقت، السعر، عدد الطلاب في الكورس الواحد.
(2) الـ Hospitation، بعتمد على نقطتين رئيسيتين:
• النقطة الأولى: هل أنت جاهز تعمل Hospitation ولا لأ؟
المعظم وأنا كنت منهم بعتقد إنه بس يخلص الـ B2 إنه ختم اللغة، وصار جاهز لكل اشي. وبقدر يلقي خطاب في الـ Bundestag ويوحد الشعب الألماني.
لكن صدقًا الـ B2 هو الجزء السهل في مرحلة الطبيب، الـ Fachsprache عالم ثاني. وكمية مصطلحات كبيرة، وقواعد جديدة، بتختلف كليًا عن اللغة العامية اللي درسها الواحد قبل ما يمتحن B2، ما بدي أخوفكم ولكن هاي الحقيقة.
الفائدة من الـ Hospitation لامتحان الـ FSP كويسة وممكن تكون عظيمة وعظيمة جدًا ولكن بشرط. إنه الطبيب يكون دارس مادة الـ FSP كاملة، ومتمكن من مهارات الـ Anamnese والـ Dokumentation والـ Vorstellungsgespräch، عشان لما يداوم ويحضر الـ Morgengespräch يكون فاهم شو الأطباء قاعدين بحكوا، ولما يلف راوند مع الدكاترة عالمرضى يكون فاهم شو بصير، وإذا فيه دخول جديد، يحاول يروح يوخذ Anamnese وبعدها يكتب الـ Dokumentation، ويشوف أحد المقيمين أو الأخصائيين عشان يصححوا له الـ Brief، هيك بكون هو عنجد قاعد بستفيد من الـ Hospitation.
سلبيات عمل الـ Hospitation
أما إنه الواحد يكون مخلص B2 جديد ويطلع على ألمانيا مباشرة على Hospitation بدون ما يكون فاتح ولا دارس مادة الـ FSP ومتمكن من المهارات الرئيسية، رح يكون زي الأطرش بالزفة، ويحس حاله ولا فاهم اشي، ويصير يشكك بقدراته وبلغته وإنه بفهمش ألماني، وبتهتز ثقته بنفسه، ورح يكون وجوده في الـ Hospitation زي عدمه، ورح يصير يضيع وقت على حاله ويصرف مصاري زيادة ويأخر بحاله وهو المتضرر الأول.
كثير من الزملاء ما فتحوا مادة الـ FSP، وبلشوا أول ما وصلوا ألمانيا Hospitation في أقسام Kardiologie وفي مستشفيات محترمة جدًا وحواليهم أخصائيين ومقيمين عرب، ولكن كانوا زي الطرشان في الزفة، في منهم كابَروا وظلهم مكملين الشهر والشهرين والثلاث، وضيعوا على حالهم الوقت، وفي منهم اعترفوا إنهم شغالين خطأ وقبلوا الواقع وعملوا الصح وقرروا يوقفوا Hospitation عبين ما يدرسوا مادة الـ FSP ويتمكنوا من المهارات الأساسية، وبعدها في منهم رجع عمل Hospitation وبعدها امتحن ونجح، وفي منهم أخذوا دورات FSP Vorbereitung وامتحن ونجح، ومنهم اللي كمل دراسة لحاله ونجح.
الصح أنه الواحد يدرس مادة الـ FSP ويتمكن من المهارات كلها بعدين يداوم Hospitation غير هيك حكي فاضي وتضييع للجهد والوقت والفلوس تضييع الفلوس بأنه الشخص رح يضيع شهر وشهرين بالـ Hospitation، ورح يدفع أجار ومصاريف، وبكون بأخر حاله إنه ينجز ويكون جاهز ويمتحن FSP.
• النقطة الثانية: بتتعلق بالمستشفى اللي رح تعمل فيه Hospitation
لما المستشفى يكون عليه ضغط كبير، الأخصائيين والمقيمين بكون همهم الأول والوحيد إنهم يخلصوا الشغل تبعهم. فمن المنطقي إنهم ما يعيروك أي اهتمام. والبعض منهم رح يستغل وجودك ويطلبوا منك تروح تسحب دم من المرضى عشان تشيل عنهم شوية حمل وهم يقدروا يخلصوا مسؤولياتهم الأخرى. وما رح تلاقي حدا فاضي يصحح لك الـ Brief اللي رح تكتبوا. فتُقتصر الفائدة على ممارسة اللغة بشكل أو بآخر أثناء الدوام مع المرضى، ولكن الفائدة الحقيقية إنت بدك إياها غير موجودة.
فالأفضل تشوفوا مستشفى أو قسم إلكم معارف فيه، لأنه ممكن هم اللي يهتموا فيكم مزبوط، هيك بكون الوضع ممتاز.
والأفضل إنه تختاروا مستشفى ما عليه ضغط كبير، ببين من عدد الأسرة اللي في المستشفى، وتختاروا أقسام ما عليها ضغط.
مش لازم تعمل Hospitation في قسم الباطني أو الجراحة العامة فقط، ومش لازم تعمل Hospitation في مستشفى جامعي.
ممكن تعمل Hospitation في قسم Rehabilitation أو قسم Neurologie. وتستفيد أكثر بكثيييير من اللي بعملوا Hospitation في الأقسام اللي عليها ضغط. غير إنه كونك في المستشفى كHospitant بتقدر تتحرك في المستشفى براحتك. وممكن (وبعيد ممكن) إنك تقدر تفوت على بعض مرضى الأقسام الثانية. وتوخذ منهم Anamnese، أو بتقدروا تيجوا أثناء المناوبة وقتها وتقعدوا بالطوارئ وتحاولوا تستفيدوا.
وفي كمان الـ Hausarztpraxis /Hausarztzentrum، هاي بتكون عيادة Family Medicine أو مركز صحي. بكون فيها أخصائيين أعدادهم من اثنين لحد 6، بكونوا Innere Medizin وإذا المركز كبير ممكن يكون فيه أخصائي Allgemein Chirurgie. وفي طاقم تمريضي وكل اشي، ممكن تشوفوا هاي الفرصة لأنها منتشرة بكثرة في المدن خاصة الصغيرة. فتلاقوا اشي قريب عنكم، ودوامهم دوام وزراء (مريح جدًا)، فبتوفروا تعب الروحة للمستشفيات اللي ممكن تكون في مدن ثانية. في عدة زملاء عملوا فيها Hospitation وانبسطوا بالنتيجة واستفادوا كويس ووفروا على حالهم وقت وتعب التنقل من مدينة لمدينة، ولكن كل ما كان الـ Hausarztzentrum أكبر كانت الفائدة أكبر.
(3) الدراسة الذاتية لامتحان الـFSP؟
هاي الطريقة الأوفر ماديًا بدون شك، ولكنها الأصعب واللي محتاجة جهد أكبر.
ممكن الواحد يدرس المادة لحاله في البيت، وما يوخذ دورة تحضيرية ولا يعمل Hospitation. ولكن عشان الواحد يستفيد، بعد ما يخلص مادة الFSP ويتكمن من مهارات الـ Anamnese والـ Dokumentation، لازم يصير يعمل Simulationen. وبالتالي ما بقدر يكون لحاله بهاي الخطوة، محتاج زملاء ثانيين يصيروا يعملوا Simulationen مع بعض، ويتعلموا من أخطاء بعض. وممكن يستعينوا بزملاء لإلهم يكون ممتحنين ومخلصين ومن فترة لفترة يعملوا معهم Simulation كامل. عشان تصحيح الأخطاء اللغوية اللي بتصير أثناء الـ Anamnese وكتابة الـ Dokumentation، وتقديم الحالة.
ولكن صدقًا الطبيب بعد ما يبلش دوام بكون وقته مضغوط جدًا ومسؤولياته كبيرة. وبالتالي مش من السهل تلاقوا زميل أكبر منكم يوفر لكم هاي المساعدة. وما تزعلوا من حدا إذا اعتذر منكم أو وعدكم يساعدكم وبعدها ما قدر.
• الخلاصة
مش لازم أعمل Hospitation عشان أنجح بامتحان الـ FSP، بقدر أنجح بدونه.
مش لازم أعمل FSP Vorbereitungskurs عشان أنجح بامتحان الـ FSP، بقدر أنجح بدونها.
بقدر أستعد وأنجح بالامتحان بخطوة وحدة من اللي فوق، وبقدر أعمل ال3 خطوات معًا.
ولكن بغض النظر عن الخطة اللي رح تعتمدوها. لازم الكل يبدأ بدراسة مادة الـ FSP بعد ما يحصل شهادة الـ B2. ونصيحة أخوية إنكم تبلشوا بالمادة وأنتم بالأردن، تتمكنوا منها قبل ما تسافروا هيك بتوفروا وقت وفلوس على حالكم. ما في داعي للاستعجال ومسابقة الريح في الطلعة على ألمانيا، ألمانيا ما رح تهرب.
بعرف البوست طويل، ولكن هو نصيحة أخوية كنت أتمنى إني لقيتها قبل ما أسافر على ألمانيا. وفي هاي النصيحة إرشاد وتوفير كبير للجهد والوقت والفلوس.
بالأخير أنت أولى بكل قطرة عرق، وبكل دقيقة وبكل قرش بتقدر توفرهم على حالك.
ضروري جدًا أي حدا مخطط يطلع ويسافر لألمانيا يقرأ اللي فوق ويعرف شو اللي بستناه، اعملوا منشن لزملائكم وزميلاتكم.
في بوستات رح أنشرها في الفترة الجاي عن عدة مواضيع مهمة ثانية. آلية التسجيل لامتحان الـ FSP، طبيعة امتحان الـ FSP. ومصادر الدراسة، وغيرها من المواضيع المهمة الأخرى، ورح أشارك تجربتي الشخصية بشكل مفصل.
موفقين جميعاً
كل الشكر لكاتب هذه المقالة الدكتور محمد أبو عيد له كل الشكر 😍💐😊
نرغب الآن في التعرف على خبراتك:
أي الأفضل بالنسبة للأطباء: الولايات المتحدة الأمريكية أم ألمانيا؟
• سلسلة مقالات نجاحك أكيد مع الدكتور أبو عيد:
ننصحكم بشدة بقرائتها وذلك لانها ستزيد من فهمكم لمواضيع عديدة وبالتالي فرص نجاحكم في تعلم اللغة الألمانية والامتحانات والعمل. جمعناها كلم في المقالة التالية:
• سلسلة مقالات “نجاحك أكيد مع الدكتور أبو عيد”
هل تريد معلومات أكثر؟ عندك أسئلة؟
إنضم الآن (🇩🇪 JETZT) لكل جروباتنا
(الروابط موجودة في آخر الصفحة إذا كنت تتصفح من الهاتف وعلى يسار الصفحة إذا كنت تتصفح من الحاسوب)