للأطباء الأردنيين والمكسيكيين: برنامج متخصص “specialized”

السلام عليكم

نزلت قبل فترة سؤال عن برنامج Das Specialized، اللي بتوفره الArbeitsagentur للأطباء الأردنيين

بعرف البوست طويل كثير، بس إن شاء الله الفائدة تكون برضو كبيرة

المعلومات اللي بالبوست كثير قيمة وإن شاء تفيد الجميع

أنا عملت مقابلة Skype معهم، وقعدت تقريبًا ساعة كاملة وأنا بتناقش مع الموظف عشان أفهم الصورة الكاملة عن البرنامج وأتعمق بتفاصيله، رح أنقل الصورة اللي أخذتها منهم بتصرف بسيط، وإن شاء الله يسعفني اجتهادي، المقابلة كانت بالألماني لحد ما وصلت لمرحلة ألمانيّاتي ما ساعدتني، فطلبت من الموظف نحول للغة الإنجليزية، وكان جدًا متعاون وكملنا باللغة الإنجليزية

1) شو هو البرنامج؟

هو برنامج لاستقطاب الأطباء لألمانيا، بساعد الطبيب من الألف إلى الياء

البرنامج متعاقد مع عدة مستشفيات وفي إلهم مقاعد إقامة محجوزة في هاي المستشفيات للأطباء المشتركين معهم

بساعدوك كطبيب في كثير أشياء من الصعب جدًا إلى المستحيل إنك تقدر تحصلها لحالك، وبخفف عليك التكاليف المالية بشكل كثير كبير فوق ما تتصور

البرنامج بدأ بسنة 2017 مع الأطباء المكسيكيين، وشاف إقبال كويس من الجهتين، كثير أطباء مكسيكيين قدموا للبرنامج، والمستشفيات عجبتها كفاءة الأطباء، فكملوا البرنامج وقاعدين بحاولوا يتوسعوا فيه ويشملوا دول أكثر

بالنسبة للأطباء الأردنيين، البرنامج بدأ بشكل جدي بسنة 2021، لسا الموضوع طري وفي بداياته، ويُؤْخَذ عليهم كبرنامج ضعف التسويق والنشر عنه بين الأطباء في الأردن، مع إني بس سألت الموظف مُسْتَغْرِبًا ليش مش كثير أطباء بالأردن سمعوا عنكم، استغرب هو برضو وحكالي المفترض موضوع التسويق والنشر هاي مسؤولية الPartners اللي احنا متعاقدين معهم في الأردن، الPartners هذول حسب الموظف هم وزارة الصحة الأردنية ونقابة الأطباء، ليش وزارة الصحة والنقابة ما بروّجوا للبرنامج؟؟!! الله أعلم

في برنامج وقعته وزارة الصحة مع الحكومة الألمانية بال2020 بهدف تجهيز عدد من الأطباء الأردنيين والتكفل بتعليمهم اللغة الألمانية من أجل إرسالهم للتخصص الطبي في ألمانيا، وكان في بعض الشروط التعجيزية للخريجين الجدد (مثلًا بتذكر كانوا طالبين خبرة سنتين) عشان يقدر الطبيب يسجل بالبرنامج مع وزارة الصحة

أتوقع في علاقة بين هاد البرنامج تبع وزارة الصحة وبرنامج Das Specialized، بس وزارة الصحة أعطت انطباع إنه التسجيل بتم من خلالها ووفقًا لشروطها فقط، مع إنه بقدر الطبيب يسجل بالبرنامج بشكل منفصل، هاد التفسير والربط اجتهاد شخصي مني بناءً على الطبيعة اللي بتمشي فيها الأمور عنا بالبلد

برنامج Das Specialized بعطيك فرص أفضل وبتقدر تقدم له بشكل منفصل عن وزارة الصحة، بتقدر تستغل جهدك ولغتك اللي تعلمتها بنفسك وتقدم للبرنامج

مثلًا بالنسبة إلي كفلسطيني حامل لهوية أبناء الأردنيات والجواز الأردني المؤقت، نقابة الأطباء والمجلس الطبي الأردني عاملوني كأردني، بينما وزارة الصحة رفضت تعاملني كأردني، وبالتالي ما كان بزبط أسجل بالبرنامج مع وزارة الصحة، بينما ألمانيا تعاملني كأردني وعشان هيك تم عرض علي المشاركة بالبرنامج من قبل Arbeitsagentur

2) شو شروط الاشتراك؟

يكون الطبيب أردني

يكون الطبيب خريج الأردن

يكون الطبيب مخلص سنة الامتياز ومعه مزاولة المهنة

يكون الطبيب حامل لشهادة الB2

يكون الطبيب لسا في بداية الطريق، ويفضل الاشتراك معهم من قبل تقديم الأوراق لنقابة الأطباء

ما يكون الطبيب مسجل في امتحان الFachsprachprüfung، باللحظة اللي بتسجل فيها أو بتكون مسجل للFSP بتفقد الفرصة بالمشاركة بهاد البرنامج

ممكن التسجيل في البرنامج بشكل مبدأي أو التواصل معهم وإبداء الرغبة بالاشتراك قبل الحصول على شهادة الB2، بس دخول البرنامج بشكل رسمي ما بتم غير بعد الحصول على الB2

3) ليش تم استهداف الأطباء الأردنيين خريجين الأردن؟

بشكل مبدأي الحكومة الألمانية عندها صورة إنه فيه في الأردن فائض الأطباء، وخريجين الأردن بالعادة بوخذوا Gleich فبدخلوا بالنظام الطبي أسرع من غيرهم، وصورة الطبيب الأردني جيدة جدًا في ألمانيا، ومساعدة الأطباء اللي بعانوا من العائق المادي وتكاليف القدوم لألمانيا

4) شو بقدم البرنامج؟

بس تسجل معهم وتقدم عن طريقهم، هم بكونوا بتابعوا أوراقك وملفك بنقابة الأطباء اللي بالولاية اللي إنت بدك تسجل فيها، وبساعدوك بتقديم الفيزا وبحاولوا إنه الأمور تتم بأسرع وقت ممكن

الفيزا اللي رح تطلع لك بمساعدتهم رح تكون 16Dأو فيزا بتسمح لك تشتغل حسب قوانين العمل، بالعادة الفيزا اللي بنطلع عليها كأطباء من الأردن سواء كانت بحجز دورات لغة أو Hospitation بتكون 16F، وهاي ممنوع تشتغل عليها في البداية عبين ما تقدم للإقامة وتطلع لك

البرنامج بقدملك 3 أشياء رائعة Hospitation وسكن ووعد عمل، كيف بتم الأمور؟

بس تخلص الB2 وتسجل بالبرنامج بشكل رسمي، بعملوا معك مقابلة سكايب عشان يشرحوا لك كيف الأمور رح تتم، رح يسألوك عن اهتماماتك وشو التخصصات اللي إنت حاببها، لأنه كل ولاية في مقاعد إقامة محددة ولتخصصات مختلفة عن الولايات الأخرى

حسب اهتماماتك والتخصص اللي بدك إياه بنسقوا لك مقابلة مع إحدى المستشفيات اللي متعاقدين معها عأساس إنك مناسب للمقعد المحجوز إلهم، وبناء على المقابلة بتم الإجراءات الثانية

في حال إنه المستشفى أُعْجِبْ فيك وحب إنه يوخذك، بوقع معك عقد (وعد عمل)، وبتطلع عندهم Hospitation في القسم المعني، الHospitation بحاولوا قدر الإمكان يكون مدفوع الأجر ولو بشكل رمزي، وبكونوا موفرين لك سكن تقعد فيه أثناء هاي الفترة

طبعًا بنفس الوقت بكونوا مسجلينك بدورات طبية تحضيرية لامتحان الFSP، والدورات هم بتكفلوا فيها، وبتكفلوا بتكاليف امتحان الFSP

وفي حال كنت مقدم في ولايات معينة ما طلع لك فيها Gleich، بسجلوك بدورة طويلة الأمد للتحضير لامتحان الKenntnisprüfung، وبرضوا بتكفلوا بامتحان الKP

وبس توخذ الApprobation بتبدأ الإقامة تبعتك في المستشفى اللي إنت بتكون موقع وعد العمل معه

5) شو رح يترتب على هاي الأمور؟

أولًا التكاليف المادية للدورات والامتحانات والسكن رح توفرهم على حالك، وبالتالي الحساب المغلق اللي مطلوب منك وهو بالعادة حوالي ال12,000 يورو رح يقل بشكل ممتاز، ممكن يوصل بين ال6,000 وال7,000 وهاد الاشي كثير ممتاز بالنسبة للزملاء اللي الأمور المادية بتشكل عائق لإلهم

ثانيًا تأمين Hospitation مدفوع الأجر ولو بشكل رمزي وسكن على حساب البرنامج قبل الوصول لألمانيا، وهاد الاشي صعب جدًا الواحد يحصله لوحده

ثالثًا تأمين عقد عمل مستقبلي وهاد اشي بريّح بال الواحد بشكل كبير

6) شو التخصصات اللي بوفرها البرنامج؟

حسب كل ولاية

في كل ولاية البرنامج متعاقد مع مجموعة من المستشفيات اللي بتوفر تخصصات مختلفة

في الNRW مثلًا، التخصصات المتاحة هي (Neurology, Radiology, Anesthesia, Psychiatry & Internal Medicine)

بحاول البرنامج يزير من التخصصات اللي بشملها ويوقع مع عدد أكبر من المستشفيات

في الولايات الأخرى ما عندي علم، بتقدروا تستفسروا عن هاي النقطة

7) شو الولايات اللي بشملها البرنامج؟

Baden-Würtemberg

Bavaria

Brandenburg

Mecklenburg-Western Pomerania

North Rhine-Westphalia

Rhineland-Palatinate

Saxony-Anhalt

Saarland

9) هل نتيجة الGleich رح تختلف في حال قدمت الأوراق عن طريقهم؟

لا، رح تكون نفس النتيجة وما رح تختلف

10) هل التسجيل ممكن حتى لو ما تواصل البرنامج معك؟

نعم ممكن والتسجيل مفتوح للي بده

هاد إيميل البرنامج، أعتقد بتقدروا تبعثولهم إيميل إنكم بدكم تسجلوا بهاد البرنامج

zav.specialized@arbeitsagentur.de

بالنسبة لخريجين برا الأردن، ممكن مستقبلًا يفتحوا التسجيل لإلهم، وبالتالي ظلكم متبعين عالموضوع، وممكن تبعثوا لهم إيميل وتشوفوا شو ممكن يصير

11) في حال كان حبيت أتعمق بالبرنامج وعندي استفسارات زيادة، كيف ممكن أحصل الإجابة؟

بتتواصل معهم وبتبدي رغبتك بالمشاركة، وبتطلب مقابلة Skype وبتقدر تسأل الأسئلة اللي بدك إياها

12) بالنسبة للأطباء الفلسطينيين خريجين الجامعات الأردنية (مثل حالتي)، هل ممكن الاشتراك؟

نعم ممكن الاشتراك في حال كان الطبيب حامل للجواز الأردني المؤقت، لأنه وقتها بقدم فيزته وأوراقه وبتم معاملته معاملة الأردني بألمانيا

أنا وضحت لهم حالتي، وحكيت لهم إني حامل للجواز الأردني، ولكني لا أحمل الجنسية الأردنية تجنبًا لاختلاط الأمور مستقبلًا، وكان جوابهم إنه مدام جواز السفر اللي إنت جاي فيه على ألمانيا أردني وسوف تعامل في ألمانيا مثل الأردني، إذا سوف تعامل في البرنامج مثل الأردني وبالتالي الاشتراك ممكن

13) تقريبًا كل شهر لشهرين بعملوا محاضرة تعريفية عن البرنامج

المحاضرة القادمة رح تكون بتاريخ 24.03.2022 من الساعة 2:00 الظهر للساعة 3:30، ورح تكون باللغة الإنجليزية، واللي بعدها بالألماني، بس التسجيل لحضور هاي المحاضرة مفتوح لتاريخ 21.03.2022

فاللي بده يحضر المحاضرة يستغل إنها بالإنجليزي ويسجل عشان يعرف زيادة عن البرنامج، وفي حال فتحوا المجال للأسئلة يقدر يسأل اللي بده إياه

14) طيب البرنامج بقدم كل هاي الامتيازات والتسهيلات والمساعدات، شو المقابل؟

مش معقول يعني فش مقابل (عنا بالبلد ما شاء الله ما بوفروا لك اشي، وبوخذوا منك كل اشي)

فشو وضع هدول اللي بحاولوا يوفروا لك كل اشي، شو المقابل؟

كطبيب بدهم منك تكون قد حالك وتلتزم معهم، بالنسبة إلهم في نقص بالأطباء في ألمانيا وبحاولوا هم يستقطبوا الأطباء ويسدوا هذا النقص

بالبداية وأثناء التسجيل بالبرنامج ما في أي التزام، وبتقدر إنت كطبيب تنسحب من البرنامج بالوقت اللي بدك إياه، ولكن في حال وقعت عقد للHospitation ووعد العمل، هل وقتها رح يكون في التزام؟

صراحة ما تعمقت كثير بالسؤال عن هاي النقطة، لأنه شوي الواحد بستحي يسأل عنها، بس اللي فهمته من الموظف إنه يتوقع منك الالتزام مع المستشفى خلال فترة التخصص، لكن على أرض الواقع إذا في عقد رح يتم توقيعه ممكن يكون فيه التزام إجباري وممكن لأ، هاي النقطة لازم البحث عنها بشكل أكبر

ولكن حتى لو كان ممكن الانسحاب، صراحة مش منطقي بعد كل اللي وفروا لك إياه، بس توخذ الApprobation تقعد لك فترة صغيرة وتسحب عليهم عشان تدور على التخصص اللي كنت بدك إياه، لأنه اشي بضر بصورتك كطبيب وبصورة الأطباء اللي جايين مستقبلًا من الأردن وبتنحط ملاحظة ورح تضر زملائك اللي ممكن يقدموا للبرنامج مستقبلًا

15) هل أنا اشتركت بالبرنامج؟

أنا كنت ناوي أشترك مع البرنامج، بس الوضع كان بالنسبة إلي شوي مخربط لعدة أسباب

أولًا كونه أنا تقريبًا قاطع 75% بالمية من الطريق بنفسي وبجهدي، ومقدم أوراقي وفيزتي طلعت ومتواجد حاليًا بألمانيا، وباقي لي فقط امتحان الFSP

ثانيًا أنا خلصت سنة إقامة جراحة عيون في الأردن، ومصمم إني أكمل عيون بألمانيا، أوراقي بعثتها لولاية الNRW، وبهاي الولاية التخصصات اللي بوفرها البرنامج هي (Neurology, Radiology, Anesthesia, Psychiatry & Internal Medicine)

عُرِض علي الاشتراك الفوري مقابل إني أغير تخصصي من جراحة عيون لأحد التخصصات المتوفرة بس رفضت، كنت بقدر أحكي للموظف خلص بغير تخصصي، وأشترك معهم وأستفيد منهم وأقعد معهم فترة عبين ما آخذ الApprobation وبعدها أنسحب في حال ما في التزام إجباري، بس ما فكرت بالموضوع للنقاط اللي أشرتها سابقًا فوق

تخصص العيون متوفر ببعض الولايات الأخرى، بس هيك لازم أنقل ملفي من الNRW للولاية المعنية، وغالبًا رح أخسر الGleich وقتها وأضطر أمتحن الKenntnisseprüfung

في بعض الأسئلة لسا بستنى إجابتها من الموظف، متى ما جاوبني بضيفها عالبوست

————————–

هاي توضيحات إضافية لبعض النقاط وأجوبة عن الأسئلة اللي سألوني إياها الزملاء

16) عدد مقاعد الإقامة في البرنامج محدود، لو الواحد ما قدر يحصل وعد عمل، شو الترتيبات؟

بالنسبة لموضوع عقود العمل والسكن والHospitation، كيف الأمور رح تصير، لأنه الأمور ممكن يشوفها الواحد وردية وسلسة، ولكن لازم توضح الصورة بشكل أكبر

بعد استيفاء المتطلبات وشروط الدخول بالبرنامج

بتم التواصل معك وعرض التخصصات المتاحة، وسؤالك عن التخصص اللي بدك إياه، وبعدها البرنامج بخليك تعمل مقابلة مع الأقسام المعنية والمستشفيات، وبناء على المقابلة بتم الخطوة الثانية، المستشفى اللي رح يوقع معك وعد العمل هو اللي يتكفل بالسكن والHospitation مش البرنامج

في حال المستشفى أُعجِب فيك ووقع معك وعد العمل بتكون الأمور ممتازة جدًا

ولكن للأسف في حال المستشفى ما حب يوقع العقد معك، وقتها إنت مخير بين عدة أمور

تشوف نتيجة المقابلات مع المستشفيات الأخرى

تشوف التخصصات الثانية المتاحة في الولاية

تنتظر عبين ما يفضى مقعد جديد أو يوقع البرنامج مع مستشفى جديد وهاي رح توخذ وقت طويل

الخيار الأخير هو إنك تنسحب من البرنامج وتكمل الطريق على تكلفتك الشخصية زي ما كنت ناوي من قبل

التسجيل بالبرنامج اشي، والاشتراك اشي مختلف

التسجيل بتم بتعبئة الفورمات والأوراق المطلوبة

الاشتراك بعطيك الامتيازات المذكورة بالبرنامج، ولكن يُعتبر الطبيب مشترك فقط في حال وقع عقد مع أحد المستشفيات

17) موضوع مهم جدًا بالنسة لخريجين الأردن:

ولاية الNordrhein Westphalen هي آخر الولايات المنضمة للبرنامج، والمقاعد والتخصصات اللي فيها قليلة ومحدودة، فالواحد بده يكون حاطط هاد الموضوع بالحسبان، لأنه في الولايات الأخرى الوضع فيها أفضل والفرص والتخصصات المتاحة أفضل بكثير من الNRW ولكن الطبيب بنسبة كبيرة جدًا ما رح يطلع له Gleich ورح يضطر يمتحن مستقبلًا الKenntnissprüfung

شو أفضل اشي الواحد يعمله؟

برأي الشخصي، لازم الطبيب يوازن بين الإيجابيات والسلبيات في حال اشترك بالبرنامج أو أخذ الطريق بنفسه، يشوف التخصص اللي بده إياه وصعوبة الحصول عليه بنفسه، ويدرس هل مستاهل الموضوع إنه يغير الولاية ويخسر الGleich ولا مش مستاهل

في حال قرر يروح مع البرنامج

يقرر التخصص اللي بده إياه

يشوف الولايات اللي بتقدم هاد التخصص في حال كان فيه أكثر من ولاية

يشوف تجارب الزملاء ويقارن بين هاي الولايات من ناحية طبيعة امتحانيّ الKenntnisseprüfung والFSP

ويختار الولاية الأفضل بينهم

18) بس الواحد يترجم أوراقه ويجهزها، يبعثها لمركز المعادلة في ألمانيا مباشرة ولا للبرنامج؟؟

بس تجهز الأوراق تواصل معهم، عشان تشوف وقتها التخصص اللي بدك اياه في أي ولاية متاح، وترسل أوراقك لمركز المعادلة في هاي الولاية

19) في حال الواحد متزوج هل ممكن يتكفلوا بمصاريف قدوم زوجته أو أبناؤه؟

للأسف في البداية لأ

بس الطبيب يبلش شغل رسمي بقدر يجيبهم بالطرق المعروفة، البرنامج ما بدعم هاد الموضوع

20) الانسحاب من البرنامج أثناء مرحلة الإقامة وقبل ما يخلص عقد العمل؟

هاد الاشي البرنامج ما بتدخل فيه، ولكن رح تتسجل ملاحظة

الاشي هاد بعتمد على نص العقد اللي تم توقيعه بين الطبيب والمستشفى، لانه المستشفى هو اللي رح يدبر له سكن وHospitation ودورات التحضير للFSP وللKP، وبالتالي العقد خو اللي بحدد إمكانية الانسحاب وما يترتب عليها

ولكن البرنامج توسعوا فيه بعد التجربة مع الأطباء المكسيكيين، هيك حركة رح تضر بصورة الطبيب الاردني وتقلل من الفرص للزملاء اللي ناويين يشتركوا مستقبلًا، كونها ملاحظة رح تتسجل

21) ملاحظة أخيرة بالنسبة للأطباء خريجيين الجامعات غير الأردنية

حسب قوانين التسجيل في الفترة الحالية متاح لخريجين الأردن فقط، وكنت ذاكر فوق إنه ظلكم متبعين معهم أو تواصلوا مع البرنامج وشوفوا شو ممكن يحكوا

في زملاء خريجين خارج الأردن الله يجزيهم كل الخير تواصلوا مع البرنامج وحكولهم ما في مشكلة سجلوا، فهاي فرصة رائعة لبقية الزملاء اللي حابين يسجلوا

رأيي الشخصي البرنامج مفيد جدًا جدًا ل3 أشخاص

1. الطبيب اللي بده التخصصات المتاحة في الولاية اللي بتعطيه Gleich حسب تجارب زملاؤه

2. الطبيب اللي الحساب المغلق يشكل صعوبة كبيرة

3. الطبيب اللي ما عنده مشكلة يغير الولاية وما يوخذ Gleich ويمتحن الKenntnisseprüfung في مقابل الحصول على التخصص اللي بده إياه في أسرع وقت في الولايات الأخرى اللي بتوفر له هاد التخصص

بعرف كثير البوست طويل، بس البرنامج ممكن يفيد كثير من الزملاء، والصراحة فرصة للي بدور على التخصصات المتاحة إنه يوخذ الطريق الأقصر والأوفر ويضرب أكثر من عصفور بحجر واحد

حاولت اختزال المقابلة قدر الإمكان، وإن شاء الله إني أكون قدرت أفهم الصورة بشكل صحيح وأنقل لها لكم بالشكل الصحيح

الدكتور عيد أبو عيد له كل الشكر والتقدير: https://www.facebook.com/Mohammad.Hakam.Abu.Eid