• مقدمة عن كيفية الحصول على تخصص تنافسي طبي في ألمانيا
السلام عليكم ورحمة الله وبركاته،
انا زميلكم عاصم حزيني طبيب خريج الجامعة الاردنية, وحصلت مؤخرا على وظيفة مقيم في طب وجراحة العيون Assistenzarzt، وهاي اول وظيفة الي كمقيم Assistenzarzt سواء داخل او خارج ألمانيا. ونظرا لانه هاد التخصص من التخصصات التنافسية في ألمانيا، راح احكي بهاد البوست عن تجربتي في التقديم للتخصص وشو هي الامور اللي ساعدتني حتى احصل عليه، والنصائح اللي راح احكيها بتفيد في التقديم لجميع التخصصات بالاخص التنافسية منها وليس فقط للعيون. هاي النصائح هي من تجربتي بالبحث عن وظيفة في هذا التخصص لقرابة ال5 اشهر بعد ما يقرب ال 1000 طلب تقديم في 4 ولايات مختلفة، وبعد ما يقرب ال 20 مقابلة، وطبعا كل الشكر لجميع الزملاء سواء المقيمين او الاخصائيين اللي قدمولي نصائح خلال هالفترة وهالتجربة. مثل ما كلنا بنعرف وبنسمع، فتخصص العيون هو من التخصصات اللي عليها تنافس عالي بألمانيا، سواء من الاطباء الالمان نفسهم او من الاجانب. مدة التخصص هي 5 سنوات واماكن عمل الاختصاص تختلف ما بين المستشفيات, ومراكز طب العيون والعيادات اللي جزء كبير منها بعملوا عمليات (مثل Lidchirurgie, Katarakt, التداخلات العلاجية المختلفة بالليزر, عمليات تصحيح البصر بالليزر). العديد من الزملاء خبروني انو زمان كانت مدة الاختصاص مقسمة بين المستشفيات والعيادات (بمعنى ما بتقدر تعمل مثلا كل مدة الاختصاص في عيادة او مركز عيون)، لكن هاد الحكي التغى حسب ما خبرني العديد من الزملاء، وحاليا في بعض مراكز العيون بتقدر تعمل فيها كل مدة الاختصاص في حال هالشي كان متوفر عندهم وعندهم تصريح بهالشي، او غالبية مدة الاختصاص مثل 4 سنوات او 4 سنوات ونصف.
في المقالة التالية في موقع فاخ آرتست يتست يمكن معرفة طريقة التخصص الطبي في ألمانيا من خلال عشر خطوات:
🇩🇪 خطوات التخصص الطبي في ألمانيا: الدليل الأشمل والأحدث على الإنترنت
• كيف ممكن الاقي شواغر بهالتخصص؟
يوجد العديد من المواقع اللي بنزل عليها وظائف شاغرة للاطباء، لكن انا صراحة ما وجدتها مجدية، ونادرا ما يتم طرح وظائف اقامة بالعيون عليها، لانو جزء كبير من هالشواغر بتكون محجوزة او بتتعبى بسرعة نظرا لكثرة التنافس. طيب كيف ممكن الواحد يحصل وظيفة؟ الطريقة الأنسب برأيي من خلال مواقع نقابات الاطباء المختلفة، بمعنى لو مثلا انا بدي ابحث عن وظيفة مقيم عيون في الاماكن التابعة لنقابة Nordrhein في ولاية NRW, فببحث على جوجل عن Ärztekammer Nordrhein Weiterbildungsbefugte, وبدخل على الصفحة الخاصة بهالشي على موقع النقابة، بعدها بختار تخصص العيون Augenheilkunde, وراح يطلعلي كل اطباء العيون اللي عندهم تصريح بانهم يدربوا Assistenzärzte في ال Nordrhein، واماكن عمل كل طبيب منهم، مع المدة المصرح الهم فيها. بعد هيك بتبحث عن اسماء الاطباء او اماكن عملهم على google واحد واحد (راح يكون في تكرار بحكم انو بالمستشفى الواحد او بالعيادة الواحدة راح يكون في اكثر من طبيب معهم تصريح تدريب Assistenzärzte)، و بتدخل على موقع المستشفى او العيادة وتشوف هل في شواغر عندهم على الموقع او لأ، في حال كان في شواغر فقدم مباشرة الهم، وفي حال عدم توفر شواغر فشوف شو طريقة التواصل معهم واعمل liste بالاماكن هاي وابعث الهم جميعا Initiativbewerbung.
في المقالة التالية كتبنا لكم أفضل الطرق لايجاد عروض عمل والتقديم على وظيفة طبية في ألمانيا:
• طيب شو هي الامور اللي بتزيد فرصتي في الحصول على وظيفة في هذا التخصص؟
1. الخبرة في مجال العيون
1. أهم اشي ممكن يساعدك هو الخبرة في مجال العيون، كل ما حصلت خبرة اكثر كل ما زادت فرصة حصولك على الوظيفة، بمعنى لو كنت عامل قبل هيك جزء من الاقامة بالعيون خارج ألمانيا، راح يساعدك هالشي جدا انك تحصل على الوظيفة، وفي حال ما عندك سنوات خبرة سابقة فعمل Hospitation بنفس التخصص مفيد جدا، وكل ما زادت مدة ال Hospitation راح تزيد فرصتك بتحصيل الوظيفة، بالاخص اذا كانت هالخبرة هي خبرة عملية، بحيث تعلمت خلالها كيف تشتغل على ال Spaltlampe وباقي الاجهزة. طيب لو ما حصلت Hospitation بالعيون اول ما اجيت على ألمانيا، وما عندي سنوات خبرة بهالتخصص من قبل، شو ممكن اعمل؟ نصيحتي هي انك تعمل Hospitation باسرع وقت بعد النجاح في ال FSP، ابحث عن المستشفيات والعيادات القريبة منك وابعثلهم انك مهتم بالتخصص وبدك تعمل عندهم Hospitation، وهالشي راح يساعدك جدا تحصل على الوظيفة لقدام. طيب في حال انك خلصت ال FSP وحصلت على ال Approbation (في حال توفر الجلايش) او ال Berufserlaubnis ومحتاج تبدا شغل باسرع وقت وما في مجال تعمل Hospitation في مجال العيون، شو في تخصص ثاني ممكن يساعدني لبعدين انو احول للعيون؟ سألت هاد السؤال ل Fachärzte بالعيون، ونصيحتهم هي كانت بانو اعمل باطني روماتيزم، او اعصاب، او اي من التخصصات الجراحية (جراحة عامة، اوعية…).
موقع فاخ آرتست يتست شرح لكم بالتفصيل عن الهوسبيتاسيون (التدريب الطبي) وكيفية الحصول عليه:
2. الأبحاث
2. هل وجود ابحاث منشورة في مجال العيون ممكن يزيد فرصة حصولي على التخصص؟ نعم، بالاخص اذا هاي الابحاث صاحبها خبرة عملية في مجال العيون (بمعنى انك كنت تشتغل بايدك على الاجهزة مثل ال Spaltlampe خلال البحث)، وبرضه وجود بحث منشور باسمك في مجال العيون بعطي انطباع انه انت مهتم بالتخصص ومستعد تتعب عشانه.
3. هل لمعدل الجامعة اهمية؟
حسب تجربتي اله اهمية لكن مش كبيرة، انا تخرجت بمعدل 3.99 من 4.00 وكنت الثاني على الدفعة، وصحيح انو هالشي كان يعجب ال Chef اثناء المقابلات، لكن ما كان يعيروه اهتمام كبير مقارنة باشي مثل الخبرة السابقة بالتخصص.
4. كم طلب توظيف يجب أن أبعث؟
هي نقطة بديهية لكن مهمة، وهي انك لازم تقدم الكثير من الطلبات، كل ما قدمت اكثر كل ما زادت الفرصة انك تحصل مقابلات اكثر وبالتالي زادت الفرصة انك تحصل فرصة عمل. ابدا بالولاية اللي انت ساكن فيها بمثل الطريقة اللي ذكرتها فوق (البحث عن الاطباء من خلال موقع النقابة) بعد هيك توسع بالولايات المحيطة. وفي حال ما حصلت وظيفة، ارجع بعد شهر مثلا من لما قدمت اول ايميلات ابعتلهم مرة ثانية، لانو مو كل الايميلات اللي بتبعتها اول مرة راح تنشاف ويتم الرد عليها، فلما تبعت مرة ثانية بتزيد فرصة انو اللي ما شاف ايميلك اول مرة يشوفه ثاني مرة، وكمان بتزيد فرصتك في حال لو ثاني مرة كان في شاغر متاح بانك تحصل مقابلة.
5. اللغة الألمانية
مستوى لغتك الالمانية مهم جدا، ومن ناحية منطقية لو الChef قابل 2 وواحد منهم لغته كثير احسن من الثاني فاكيد راح يختار اللي لغته احسن، فنصحيتي هي حاول اشتغل على موضوع اللغة من بدايات الطريق لألمانيا وخلال سنين الجامعة، وكمان قبل المقابلات حاول تدرب على المقابلة، بمعنى كون جاهز لانك تجاوب عن اي اشي بتنسأل عنه بال CV تبعتك بالالماني، اكتب ردود جاهزة واحفظها، وحاول حضّر لاغلب الاسئلة العامة مثل ليه اخترت هاد التخصص….(ممكن تستعين ب Chatgpt لهاد الغرض).
ننصح بقراءة هذه المقالات القصيرة من موقع فاخ آرتست يتست لأنه يمكنها وبدون مبالغة أن تجعلك تتعلم اللغة الألمانية بسرعة كبيرة جداً وبأقل جهد وأقل التكاليف:
🇩🇪 للأطباء والتخصصات الطبية: نصائح لتعلم اللغة الألمانية
🇩🇪 للأطباء والتخصصات الطبية: مصادر وطرق تعلم اللغة الالمانية
6. العلاقات او ال Connections
برضه هالشي مفيد جدا وكل ما بنيت علاقات اكثر مع ناس داخل التخصص سواء مقيمين او اخصائيين كل ما زادت فرصة انك تحصل وظيفة بهالتخصص، بحيث لو توفر شاغر عند احد الزملاء فممكن يخبرك فيه قبل الجميع وتقدم عليه وتحصله. طيب كيف الواحد ممكن يبني علاقات؟ في كثير طرق لكن افضلها برأيي هي ال Hospitation, سواء كان لمدة طويلة مثل اشهر، او لمدة قصيرة مثل ايام. ونصيحة إضافية هي اثناء التقديم على الوظائف انك تطلب منهم عمل Hospitationstag, هالشي بساعدك تتعرف على الاشخاص الموجودين هناك وتبني معهم علاقات، وبزيد من فرصتك في الحصول على وظيفة، ولو ما كان متوفر عندهم شواغر، هالشي بساعد انه بس يتوفر عندهم شواغر يرجعوا يتواصلوا معك ويخبروك بهالشي.
كتبنا أيضا مقالة مهمة عن كيفية اكتساب معارف من خلال مجتمعنا “فاخر آرتست يتست”؟ والحصول على تدريب أو حتى وظيفة:
🇩🇪 كيف تكسب معارف من خلال مجتمعنا “فاخر آرتست يتست”؟ احصل على تدريب أو حتى وظيفة!
7. شو هو انسب مكان لعمل التخصص؟
هل هو المستشفيات او العيادات والمراكز؟ بشكل اكيد التعليم بالمستشفيات راح يكون افضل، بالاخص في بداية فترة الاختصاص، بحكم انو في عدد اخصائيين ومقيمين اكثر بالمستشفى ففرصة التعليم اكبر، بالاضافة الى انه بالمستشفى بتشوف فيه جميع الحالات واغلب العمليات، بينما بالعيادات فأغلب المرضى هم من مرضى المراجعات الدورية او مراجعات قبل او بعد العمليات مثل ال Katarakt او مراجعات بعد اعطاء ال(intravitreale Injektion (IVOM, لهيك ما في تنوع كبير بالحالات، وفي كثير حالات طارئة ما راح تتعامل معها بالعيادات بحكم انو بتم تحويلها للمستشفيات مثل ال Netzhautablösung، بالاضافة انو بشكل عام ضغط الشغل اكبر بالعيادات، بحيث انو الوقت محدود وفي عدد مرضى كبير، فما بتقدر تقضي وقت طويل مع كل مريض لانه هاد الشي راح يوخذ من وقت المرضى الثانيين وراح يزيد مدة الدوام. لهيك بشكل اكيد لو صحلك فرصة بمستشفى فهي افضل من العيادات بالاخص في بداية فترة الاختصاص، لكن للاسف بحكم انو الشواغر بالمستشفيات عليها تنافس كبير، وبحكم انو مو كل المستشفيات فيها عيون، وبرضه حاجة قسم العيون للمقيمين مو مثل حاجة اقسام اخرى مثل الباطني، فبالتالي المقاعد المتاحة بتكون اقل، لهيك حسب تجربتي صعب جدا تحصل على وظيفة في مستشفى قبل ما يكون عندك خبرة بالتخصص، وبالتالي بتكون فرصتك بالعيادات والمراكز افضل نوعا ما. طيب هل هذا يعني انو ما أقدم للمستشفيات من اول؟ لا طبعا، انت جرب قدم وما بتعرف وين نصيبك بكون، ولو صحلك وظيفة في مستشفى فهو أفضل من العيادات بشكل عام.
8. الصبر
الموضوع ما راح يكون سهل، بالاخص اذا ما عندك خبرة سابقة بهاد التخصص، راح تقدم طلبات كثيرة ، وراح تيجيك ايميلات رفض كثيرة، لكن اهم اشي انك ما تيأس وتضلك تحاول وتحاول، بالاخر الموضوع هو توفيق من ربنا، واحنا علينا نتعب ونسعى.
بتمنى اني اكون قدمتلكم معلومات مفيدة، وبتمنى التوفيق للجميع
لا تنسوا اهلنا في غzة من دعواتكم
للمزيد من الأفكار عن كيفية الحصول على التخصصات الطبية في ألمانيا يمكن قراءة هذه المقالة المهمة:
🇩🇪 أسرار الحصول على التخصصات الطبية في ألمانيا وتحسين السيرة الذاتية
كاتب مقالة كيف احصل على تخصص تنافسي في ألمانيا؟ (طب وجراحة العيون كمثال):
الدكتور عاصم حزيني
له كل الشكر والإحترام 💐😊
هل تريد معلومات أكثر؟ عندك أسئلة؟
إنضم الآن (🇩🇪 JETZT) لكل جروباتنا
(الروابط موجودة في آخر الصفحة إذا كنت تتصفح من الهاتف وعلى يسار الصفحة إذا كنت تتصفح من الحاسوب)