• مقدمة
في هذه المقالة، نشرح للحاصلين على المعادلة (gleich) في NRW (Nordrhein-Westfalen) كيفية الحصول على الـ Approbation في أسرع وقت بعد نجاحهم بإمتحان اللغة الطبية FSP.
إن شاء الله بس تمتحنوا الـFSP في دوسيلدورف وتنجحوا فيه، بعد 4-24 ساعة من الامتحان بالعادة بتوصل النتيجة على الإيميل، بالعادة بتتواصلوا مع الموظف المسؤول عنكم في مركز المعادلة في Münster عشان إصدار الـApprobation، الموظف رح يطلب منكم مستندات مختلفة نشرحها تالياً.
إذا كان لديك أدنى شك عن نقطة معينة أو لم تفهم أي معلومة، إسأل في أي وقت على جروب فاخ آرتست يتست (Facharzt JETZT 🇩🇪) الرئيسي على الفيسبوك وعلى التيليجرام. نذكركم أن هذه المقالة هي مقالة إرشادية لمساعدتكم على فهم الأمور ولا يجب أن تعتمدوا عليها فقط. يجب دائماً العودة إلى المواقع الرسمية.
• المستندات المطلوبة بعد النجاح بإمتحان اللغة الطبية:
(1) Führungszeugnis
عدم محكومية من ألمانيا، بتم إصدارها من الـBürgeramt اللي في المدينة اللي ساكنين فيها، ثمن إصدارها 13 يورو، وبتخبروا الموظف تبع الـBürgeramt إنكم أطباء وبدكم إياها عشان إصدار ال Approbation لأول مرة، وبتطلبوا من الموظف تبع الـBürgeramt إنه يتم إرسالها لمركز معادلة Münster، وبتعطوه اسم الموظف المسؤول عنكم في Münster وعنوان مركز المعادلة، بتسلموا إشعار إنكم طلبتوها، وبتم إصدارها من المحكمة الرئيسية اللي في Bonn، بتوخذ من أسبوعين ل4 أسابيع عبين ما توصل لمركز المعادلة، إنت ما بتستلموها ولا بتشوفوها، هي بتم إرسالها مباشرة من المحكمة في Bonn لمركز المعادلة في Münster.
طبعًا لازم تكونوا ماخذين موعد في الـ Bürgeramt، فبدكم تنتبهوا لأنه في بعض المدن المواعيد ممكن تتأخر، فانتبهوا، وبالعادة كمان في كل مدينة في أكثر من Bürgeramt، فشوفوا الأفرع الثانية لأنه ممكن تحصلوا مواعيد أقرب فيها.
هل فقط بتقدروا تطلعوا عدم المحكومية من المدينة اللي عاملين فيها Anmeldung؟ ما عندي علم، إن شاء الله أحد الزملاء يجاوبنا في التعليقات.
حتى لو كنتم مطلعين شهادة عدم محكومية من بلدكم الأم والموظف تبع Münster قبلها وما طلب منكم عدم محكومية ألمانية في الـ Defizitbescheid، لازم تطلعوا وحدة ألمانية بس تمتحنوا عشان إصدار الـ Approbation.
واللي الموظف المسؤول عنكم في Münster طلب عدم محكومية ألمانية في الDefizitbescheid، وطلعتوا الشهادة أول ما وصلتوا ألمانيا، لازم تطلعوا وحدة جديدة بس تيجوا تمتحنوا، لأنه مدة صلاحيتها 3 أشهر فقط.
ولذلك ما في داعي تطلعوا عدم محكومية أول ما تصلوا ألمانيا في حال كانت مطلوبة منكم في الـ Defizitbescheid، أجلوها لوقت امتحان الـFSP، وفروا على حالكم وقت وفلوس.
(2) Ärztliche Bescheinigung
شهادة خلو أمراض جديدة من Hausarzt في ألمانيا، بتطبعوا الـ Anlage 3 نفسها اللي موجودة في فورم تقديم طلب المزاولة الخاص بـMünster، ومن أي Hausarzt في المدينة اللي ساكنين فيها.
ممكن تنعمل ببلاش وممكن تكلف من 20-30 يورو حسب ذمة وضمير الـHausarzt، اللي بطلب أكثر من هيك لا تعملوها عنده وشوفوا غيره، في زملاء دفعوا 100 يورو ثمنها لأنهم اعتقدوا إنه هيك بتكلف واستعجلوا وما سألوا عن الموضوع.
حتى لو كنتم مطلعين شهادة خلو أمراض من بلدكم الأم والموظف تبع Münster قبلها وما طلب منكم خلو أمراض من ألمانيا في الـ Defizitbescheid، لازم تطلعوا وحدة من ألماني بس تمتحنوا عشان إصدار الـApprobation.
واللي الموظف المسؤول عنكم في Münster طلب خلو أمراض من ألماني في الـ Defizitbescheid، وعملتوها وبعتوها أول ما وصلتوا ألمانيا، لازم تعملوا وحدة جديدة بس تيجوا تمتحنوا، لأنه مدة صلاحيتها 3 أشهر فقط.
ولذلك ما في داعي تعملوا خلو أمراض أول ما تصلوا ألمانيا في حال كانت مطلوبة منكم في الـ Defizitbescheid، أجلوها لوقت امتحان الـFSP، وفروا على حالكم وقت وفلوس.
(3) Anlage Nummer 7
الفورم الخاص بالتعهد بأنه لم يتم رفع أي قضايا طبية عليك في بلدك بعد ما أصدرت شهادة حسن السيرة والسلوك من نقابة الأطباء في بلدك اللي بعثتها لمركز معادلة Münster مع بقية أوراقك في أول الطريق.
في حال كان الواحد باعثها من البداية مع الأوراق، لا بأس إنه يرجع يطبعها ويوقعها مرة ثانية بتاريخ جديد ويبعثها.
(4) إيميل نقابة الأطباء وفي النتيجة بنجاحكم في امتحان FSP
بتطبعوه وبتبعثوه مع البريد، طبعًا نقابة الأطباء بذاتها رح تتواصل مع مركز المعادلة وتخبرهم إنكم نجحتوا.
(5) Anschreiben
رسالة بتكتبوا فيها للموظف المسؤول عن ملفكم في Münster إنكم امتحنتوا في اليوم الفلاني في التاريخ الفلاني ونجحتوا، وإنه نقابة الأطباء المفترض تواصلت معه وأبلغته بنتيجة امتحانكم، وبتطلبوا منه إنه يصدر لكم الـ Approbation في أسرع وقت ويبعث لكم إياه على العنوان اللي أنتم ساكنين فيه حاليًا، وضروري تذكروا العنوان خاصة إنه ممكن الواحد يغير سكنه، بلا ما يبعث الموظف الـ Approbation على عنوانكم القديم مثل ما صار مع بعض الزملاء.
في المغلف بتحطوا الـ Anschreiben مع الإشعار اللي استلمتوه بخصوص إصدار عدم المحكومية، مع الـ Anlage 3 الموقعة من Hausarzt، مع الإيميل تبع النتيجة، مع الـ Anlage 7 الموقعة، وبتبعثوهم بالبريد للموظف تبعكم في Münster.
• متى يجب ان تبدأ بهذه الإجراءات؟
بالعادة بس تبلشوا بهاي الإجراءات بعد ما تنجحوا، بوصلكم الـ Approbation بعد ب3-6 أسابيع من امتحانكم وذلك حسب همة الموظف اللي رح يصدر لكم عدم المحكومية في المحكمة في Bonn وهمة الموظف تبعكم في Münster.
• خطة مختصرة من أجل الحصول على الأبروباتسيون بأسرع وقت ممكن
اختصارًا للوقت وعشان يوصلكم الـ Approbation بأسرع وقت ممكن، وكونه عدم المحكومية بتوخذ وقت عبين ما تطلع وتوصل لمركز معادلة Münster، بتقدروا تروحوا تصدروا عدم المحكومية من الـ Bürgeramt قبل بشهر من امتحانكم، عشان إن شاء الله بس تمتحنوا وتنجحوا تكون جاهزة وواصلة لمركز المعادلة، وموظفكم إن شاء الله وقتها بصدر الـ Approbation وببعث لكم إياه، وهيك بوصلكم بأسرع وقت ممكن.
طبعًا فقط اصدروا عدم المحكومية قبل بشهر من الامتحان لأنه هي اللي بتطول وبتوخذ وقت، الله بعين الواحد على ال13 يورو في حال لا سمح الله ما نجح. أما الـÄrztliche Bescheinigung بتخلوها بس تطلع نتيجة الامتحان، لأنه بساعتين بتكونوا طلعتوها.
أنا عملت هيك بالتفصيل، عملت Scan لكل الأوراق المذكورة وبعثتهم بالإيميل، والأوراق الأصلية بعثتهم بالبريد بعد بيوم من الامتحان، والحمد لله الـ Approbation وصلني بعد 5 أيام من امتحاني، مع إنه موظفي Kukielka ومعروف عنه بتأخر كثير وبطلع روح الواحد، وفي كمان زميل عمل نفس الطريقة وبعد أسبوع من امتحانه كان الـ Approbation واصله.
وهيك إن شاء الله بوصلكم الـ Approbation في أسرع وقت، وبتقدروا تبلشوا تقديم ومراسلات بأسرع وقت، وتحصلوا على Stelle وتبلشوا دوام بأسرع وقت.
وفقني الله وإياكم لما فيه صلاحنا وصلاح أمتنا.
كل الشكر لكاتب هذه المقالة الدكتور محمد أبو عيد 😍💐😊
• سلسلة مقالات نجاحك أكيد مع الدكتور أبو عيد:
– الدليل الأشمل: امتحان اللغة الطبية FSP في دوسيلدورف Düsseldorf
– إجراءات التسجيل لامتحان اللغة الطبية الألمانية (FSP) في ولاية الـ Nordrhein-Westfalen
– إجراءات الحصول على الـ Approbation بعد النجاح في امتحان الـ FSP في دوسيلدورف
– التحضير لامتحان اللغة الطبية: مقارنة بين الكورسات والهوسبيتاسيون والدراسة الذاتية
هل تريد معلومات أكثر؟ عندك أسئلة؟
إنضم الآن (🇩🇪 JETZT) لكل جروباتنا
(الروابط موجودة في آخر الصفحة إذا كنت تتصفح من الهاتف وعلى يسار الصفحة إذا كنت تتصفح من الحاسوب)